ទោះមក Man UTD មែនក៏ Weghorst មិនបានអាវលេខ៧ដែរ ដោយក្លិបគ្រោងទុកអាវនេះឲ្យខ្សែប្រយុទ្ធឆ្នើមម្នាក់នេះហើយ

អង់គ្លេស៖ ក្លិប Manchester United នឹងមិនផ្ដល់អាវលេខ៧ដល់ ខ្សែប្រយុទ្ធ Wout Weghorst នោះឡើយ ដោយសារក្លិបសន្យាទៅកាន់ Joao Felix ហើយថាបើសិនគេផ្ទេរមកគឺក្លិបនឹងផ្ដល់អាវលេខ៧ឲ្យភ្លាម។

​ថ្មីៗនេះ អ្នកកាសែត Fabrizio Romano បានចុះផ្សាយថា Man UTD កំពុងចរចាជាមួយ Besiktas ក្នុងការទិញយក Weghorst ដែលកំពុងលេងខ្ចីជើងនៅក្លិប Burnley ហើយកីឡាកររូបនេះក៏បានបើកភ្លើងខៀវរួចហើយដែរ។​

យ៉ាងណាមិញ លោក Richard Arnold បានសន្យាជាមួយ  Felix ដែលជាខ្សែប្រយុទ្ធរបស់ Atletico Madrid ហើយថានឹងផ្ដល់អាវលេខ៧ដល់រូបគេ ស្របពេលលេចឮថា ក្លិបបានចរចាជាមួយ Atletico Madrid ដើម្បីទិញយកកីឡាករវ័យក្មេងសញ្ជាតិព័រទុយកាល់ម្នាក់នេះ។

​Felix បានផ្ទេរមកកាន់ទឹកដី Wanda Metropolitano កាលពីឆ្នាំ២០១៩ និងរកបាន៣៨គ្រាប់ និងបញ្ជូនបាល់១៤គ្រាប់ ក្នុងការបង្ហាញខ្លួន១៣០ប្រកួត ដែលជាតួលេខមួយដែលមិនសូវធ្វើឲ្យលោក Diego Simeone ពេញចិត្តព្រោះតម្លៃខ្លួនគេគឺដល់ទៅ ១១៣លានផោន(ស្មើនឹងប្រមាណ ១៣៧.៥ លានដុល្លារ)៕

យ៉ាងណាមិញ អ្នកកាសែត Fabrizio Romano បានចុះផ្សាយថា Joao Felix បានយល់ព្រមផ្លាស់មកក្លិប Chelsea ហើយក្នុងលក្ខខណ្ឌខ្ចីជើង ដោយមិនអាចទិញផ្ដាច់បានឡើយ៕

ប្រភព៖​ thesun