ទំនងអត់? លោក Pep សុំឲ្យ Man City ចុះហត្ថលេខាយកជម្រើសជាតិអង់គ្លេសរូបនេះ នៅរដូវកាលក្រោយ

អង់គ្លេស៖ គ្រូបង្វឹកក្រុមមេឃខៀវManchesterCity លោក​ Pep Guardiola ត្រូវគេរាយការណ៍ថាបានស្នើសុំឲ្យក្លិបចុះហត្ថលេខាយកខ្សែបម្រើ Kalvin Phillips របស់ក្រុមLeeds United នៅពេលទីផ្សារដោះដូរកីឡាករ នារដូវក្ដៅក្រោយ។

ពិតណាស់ Phillipsជាកីឡាករសំខាន់មួយរូបរបស់ Leeds ដោយបានបង្ហាញខ្លួនចំនួន២១៥ប្រកួតសម្រាប់ក្រុម ចាប់ពីតាំពីការបង្ហាញខ្លួនលើកដំបូងក្នុងឆ្នាំ២០១៤ រហូតបានជួយក្រុមលោក ​Marcelo Bielsa ឡើងមកលេងនៅលីគកំពូលអង់គ្លេស PremierLeague សាជាថ្មី។

មិនតែប៉ុណ្ណោះ គេក៏ក្លាយជាមាជិកសំខាន់នៃក្រុមជម្រើសជាតិអង់គ្លេសក្រោមការដឹកនាំរបស់លោក Gareth Southgate ផងដែរ ដោយបានចូលលេងគ្រប់ការប្រកួតទាំងអស់កំលុងព្រឹត្ដិការណ៍ EURO 2020 កន្លងទៅ។

ខ្សែបម្រើវ័យ២៥ឆ្នាំរូបនេះនៅសល់កុងត្រារយៈពេល ៣ឆ្នាំទៀត នៅទឹកដី Elland Road ហើយបើយោងតាមFichajes បានឲ្យដឹងថា លោក ​​Pep បានស្នើសុំក្លិបMan City ចុះហត្ថលេខាលើរូបគេ នៅមុនពេលរដូវកាល ២០២២/២០២៣ចាប់ផ្ដើម ដើម្បីបង្កើតការប្រកួតប្រជែងជាមួយនឹងខ្សែបម្រើសញ្ជាតិអេស្ប៉ាញ Rodri។

គួរឲ្យដឹងដែរថា ថ្មីៗនេះManCity ក៏ត្រូវគេដឹងថា បានចាប់អារម្មណ៍លើ Declan Rice របស់ West Ham United និង Jude Bellingham របស់ Brussia Dortmund ផងដែរ ខណៈដែល Fernandinhoត្រូវគេរំពឹងថានឹងចាកចេញពីទឹកដី Etihad ដោយគ្មានតម្លៃខ្លួននាខែមិថុនា ឆ្នាំក្រោយ៕

ប្រភព៖​ sportsmole