បរទេស៖ ក្លិបបិសាចក្រហម Manchester United ត្រូវបានគេរាយការណ៍ថា កំពុងត្រៀមខ្លួនចូលប្រជែងជាមួយក្លិបយក្សធំៗនៅ អឺរ៉ុប ក្នុងការទិញយកខ្សែប្រយុទ្ធសញ្ជាតិ ព័រទុយកាល់ Goncalo Ramos ពី Benfica។
Ramos ដែលបច្ចុប្បន្នមានវ័យ ២១ ឆ្នាំ បានធ្វើឱ្យក្លិបធំៗនៅ អឺរ៉ុប ចាប់អារម្មណ៍ខ្លាំង បន្ទាប់ពីរូបគេបង្ហាញសមត្ថភាពលេចធ្លោរខ្លាំងកាលពីព្រឹត្តិការណ៍ World Cup Qatar ២០២២ កន្លងទៅ, ជាពិសេសគឺនៅក្នុងការប្រកួតទល់នឹងក្រុមជម្រើសជាតិ ស្វ៊ីស ដែលពេលនោះរូបគេស៊ុតបញ្ចូលទីបាន ៣ គ្រាប់យ៉ាងអស្ចារ្យ ជួយឱ្យក្រុមបញ្ចខែលយកឈ្នះក្នុងលទ្ធផល ៦-១។
យោងតាមការចុះផ្សាយរបស់កាសែត ព័រទុយកាល់ O Jogo បានឱ្យដឹងថា Man UTD គឺកំពុងចាប់អារម្មណ៍ចង់បាន Ramos នៅទីផ្សារដោះដូររដូវក្តៅខាងមុខ, ប៉ុន្តែពួកគេនឹងត្រូវប្រជែងគ្នាជាមួយគូប្រជែងធំៗ ២ ផ្សេងទៀត រួមមានក្លិប Paris Saint-Germain និងក្លិបដែលមានម្ចាស់ក្លិបជាមហាសេដ្ឋីជនជាតិ អារ៉ាប់ Newcastle។
គួរដឹងថា Ramos គឺត្រូវបានក្លិប Benfica បញ្ចេញតម្លៃលក់នៅលើទីផ្សារក្នុងតម្លៃ ១០០ លានផោន ឬប្រមាណជា (១២៣ លានដុល្លារអាមេរិក)៕
ប្រភព៖ Sportbible