អាណិតណាស់! Ramos បង្ហោះសាររៀបរាប់អារម្មណ៍ពិតបែបនេះក្រោយមិនត្រូវកោះហៅចូលក្រុមអេស្ប៉ាញ សម្រាប់ការប្រកួត World Cup

November 15, 2022

អេស្ប៉ាញ៖ ខ្សែការពារ Sergio Ramos បានបង្ហោះសារដ៏វែងអន្លាយមួយរៀបរាប់ពីអារម្មណ៍របស់ខ្លួន បន្ទាប់ពីលោក Luis Enrique មិនបញ្ចូលឈ្មោះគេក្នុងក្រុមជម្រើសជាតិអេស្ប៉ាញ សម្រាប់ប្រកួតនៅព្រឹត្តិការណ៍បាល់ទាត់ពិភពលោកឆ្នាំ២០២២។

Ramos បានចូលលេងឲ្យក្រុមគោជល់អេស្ប៉ាញតាំងពីឆ្នាំ ២០០៦ រហូតដល់ឆ្នាំ២០១៨ ដោយបានបង្ហាញខ្លួនមិនក្រោម១៨០ប្រកួតនោះឡើយ និងថែមទាំងបានជួយក្រុមលើកពាន បាល់ទាត់ពិភពលោកឆ្នាំ២០១០ទៀតផង។

យ៉ាងណាមិញ លោក Enrique សម្រេចមិនកោះហៅគេចូលជម្រើសជាតិសម្រាប់ការប្រកួតបាល់ទាត់ពិភពលោកឆ្នាំនេះដែលធ្វើឡើងនៅប្រទេសកាតា ក្រោមហេតុផលកាយសម្បទាគេមិនរឹងមាំគ្រប់គ្រាន់។

ខណៈមានការរិះគន់លោក Enrique ទាក់ទងនឹងរឿងនេះ ឥលូវនេះ Ramos បានចេញមុខបង្ហោះសារមួយថា៖

កាលពីរដូវកាលមុន វាជាពេលវេលាមួយដ៏លំបាកដោយសារខ្ញុំរងរបួស និងត្រូវបន្ស៉ាំខ្លួននៅក្លិបថ្មីនិងទីក្រុងថ្មីទៀត។ ខ្ញុំបានឧទ្ទិសរាងកាយ និងវិញ្ញាណខ្ញុំដើម្បីព្យាបាលឲ្យជាសះស្បើយ និងបានត្រឡប់មកវិញព្រមជាមួយការតាំងចិត្តដ៏មុតមាំ។ ជាសំណាងល្អ ខ្ញុំអាចនិយាយបានថានារដូវកាលនេះ ខ្ញុំមានអារម្មណ៍ដូចជាខ្លួនឯងម្ដងទៀត និងរីករាយជាមួយបាល់ទាត់ និងលេងឲ្យក្លិបល្អដូចជា Paris ។ ការប្រកួតបាល់ទាត់ពិភពលោក? ពិតណាស់ វាជាក្ដីសុបិនមួយដ៏ធំ ដែលខ្ញុំគិតទុកថានឹងក្លាយជាការបង្ហាញខ្លួនលើកទី៥របស់ខ្ញុំ ប៉ុន្តែជាសំណាងអាក្រក់គឺខ្ញុំត្រូវមើលវានៅផ្ទះ។ វាពិតជាលំបាកតែព្រះអាទិត្យនឹងនៅតែរះនៅពេលព្រឹក។ ខ្ញុំនឹងមិនផ្លាស់ប្ដូរខ្លួនឯងទេ ជាពិសេសគឺស្មារតីរបស់ខ្ញុំ , ការតាំងចិត្ត ការខិតខំប្រឹងប្រែង ហើយខ្ញុំនឹងព្យាយាមដើម្បីបាល់ទាត់២៤ម៉ោង។ នេះជាអារម្មណ៍ដែលខ្ញុំចង់បង្ហាញដល់អ្នកទាំងអស់គ្នា។ អរគុណសម្រាប់ការគាំទ្រ នឹងមានការប្រកួតប្រជែងជាច្រើននិងគោលដៅជាច្រើនទៀតនៅខាងមុខ។ ជួបគ្នាឆាប់ៗ អេស្ប៉ាញ។ សូមឲ្យអ្នកសំណាងល្អ!
— ខ្សែការពារ Sergio Ramos

ប្រភព៖ football-espana

ដៃគូរសហការ One Football

អានបន្ថែម