ឃើញ Ten Hag មិនសូវប្រើប្រាស់! Everton គ្រោងដាក់សំណើខ្ចីជើងយកខ្សែប្រយុទ្ធស្លាបរបស់ Man UTD ម្នាក់នេះ នៅទីផ្សារដោះដូរខែមករា

បរទេស៖ ខ្សែប្រយុទ្ធ Anthony Elanga កំពុងស្ថិតនៅក្នុងបញ្ជីគោលដៅរបស់ក្លិបស្ករគ្រាប់ Everton នៅទីផ្សារដោះដូរកីឡាករខែមករា ដោយក្លិបដែលដឹកនាំដោយលោក Lampard មួយនេះ ចង់នាំយកកីឡាករវ័យក្មេងរបស់ Manchester United ខាងលើ ក្នុងលក្ខខណ្ឌខ្ចីជើងពេញមួយរដូវកាល។

Elanga បង្ហាញខ្លួនជម្រើសដំបូងបាន៦ ដងប៉ុណ្ណោះសម្រាប់ Man Utd នៅរដូវកាលនេះ ហើយគាត់បានបង្ហាញខ្លួនត្រឹមតែ២៤ នាទីចាប់តាំងពីការប្រកួត World Cup មកក្នុងនាមជាកីឡាករបម្រុង ទល់នឹងក្រុម Burnley និង Nottingham Forest ។

កីឡាករវ័យ២០ឆ្នាំបានបាត់បង់កៅអីទៅលើកីឡាករ Alejandro Garnacho នៅក្នុងក្រុមរបស់ Erik ten Hag ដោយខ្សែប្រយុទ្ធសញ្ជាតិអាហ្សង់ទីន ដែលបណ្ដុះចេញពីថ្នាលយុវជនរូបនេះបានបង្ហាញទម្រង់លេងលេចធ្លោល្អ នាប៉ុន្មានខែមកនេះ។ គាត់បានចូលលេងជម្រើសដំបូង ក្នុងជំនួបឈ្នះ Burnley នៅពាន EFL Cup ហើយបានចូលលេងមុន Elanga ទល់នឹង Forest នៅយប់ថ្ងៃអង្គារកន្លងទៅនេះផងដែរ។

ជាមួយគ្នានេះ ក្លិប Everton ត្រូវបានគេរាយការណ៍មកថា គឺជាក្លឹបមួយក្នុងចំណោម ក្លឹបជាច្រើនដែលចាប់អារម្មណ៍ក្នុងការខ្ចីជើង Elanga ក្នុងអំឡុងពេលទីផ្សារខែមករា ៕

ប្រភព៖​ AF