ស្ងាត់ៗ At. Madrid ចាប់អារម្មណ៍ចង់បានកូនក្រុមរបស់លោក Solskjaer រូបនេះ

អេស្ប៉ាញ៖ យោងតាមសេចក្ដីរាយការណ៍ ក្លិប Atletico Madrid ដាក់គោលដៅចង់បានខ្សែបម្រើ Jesse Lingard នៃក្លិប Manchester United បន្ទាប់ពីឃើញថាគេបានវិលត្រឡប់មកចូលរួមហ្វឹកហាត់មុនបើករដូវកាលក្រោមការដឹកនាំរបស់ Ole Gunnar Solskjaer វិញហើយ។

កាលពីខែមករាកន្លងទៅនេះ Lingard បានផ្ទេរទៅលេងខ្ចីជើងនៅ West Ham ដែលគេបានបង្ហាញទម្រង់លេងយ៉ាងល្អនៅទីនោះដោយរកបាន ៩គ្រាប់ និងបញ្ជូនបាល់ ៥គ្រាប់ក្នុងការបង្ហាញខ្លួនចំនួន១៦លើក រហូតដល់លោកគ្រូបង្វឹក Gareth Southgate បានបញ្ចូលឈ្មោះគេក្នុងបញ្ជីឈ្មោះបណ្ដោះអាសន្នរបស់កីឡាករទាំង៣៣នាក់សម្រាប់លេងនៅព្រឹត្តិការណ៍ Euro 2020 ។

យ៉ាងណាមិញ បើទោះបីជាកីឡាករវ័យ២៨ឆ្នាំរូបនេះត្រូវកាត់ឈ្មោះចោលវិញក៏ដោយក៏ Atletico Madrid នៅតែសម្លឹងឃើញថាគេអាចលេងក្រោមការដឹកនាំរបស់លោក Diego Simeone បាន។

ចំណែក West Ham ឯណោះវិញក៏ចង់ទិញយក  Lingard ផ្ដាច់ដែរស្របពេលកុងត្រារបស់គេជាមួយ Man UTD នៅសល់តែ១ឆ្នាំទៀតប៉ុណ្ណោះ។

Jesse Lingard ជាកីឡាករដែលបណ្ដុះចេញពីថ្នាលយុវជនរបស់ Mabchester United ដោយបង្ហាញខ្លួនបាន២១០ប្រកួត និងស៊ុតបញ្ចូលទីបាន៣៣គ្រាប់៕

ប្រភព៖​ dailymail