ក្រោយផ្ទុះពាក្យចចាមអារ៉ាមថាគេនឹងចាកចេញ ស្រាប់តែ De Beek ប្រាប់លោកគ្រូ Solskjaer ថា...

March 18, 2021

អង់គ្លេស៖ យោងតាមការបង្ហើបឲ្យដឹងពីលោក Ronald De Boer គឺខ្សែបម្រើ Donny Van De Beek មិនបានភ័យព្រួយអ្វីនឹងស្ថានភាពរបស់គេនៅក្លិបបិសាចក្រហម Manchester United នោះឡើយថែមទាំងសប្បាយចិត្តនឹងស្នាក់នៅជាមួយក្រុមទៀតផង។

កីឡាករសញ្ជាតិហូឡង់រូបនេះមានអារម្មណ៍កក់ក្ដៅនិងដឹងថាគ្រប់គ្នាពេញចិត្តនឹងការស្នាក់នៅរបស់គេ បើទោះបីជាគេមិនសូវបានចូលលេងក៏ដោយខណៈដែលពាក្យចចាមអារ៉ាមថាគេនឹងចាកចេញពីទឹកដី Old Trafford បានផ្ទុះឡើងយ៉ាងគគ្រឹកគគ្រេង ដោយបាននិយាយថា Donny Van De Beek នឹងចាកចេញពី Man UTD ដើម្បីស្វែងរកក្លិបណាដែលគេអាចចូលលេងញឹកញាប់បាន។

តាំងពីផ្ទេរពីក្លិប AFC Ajax ក្នុងតម្លៃខ្លួន ៤០លានផោន(ស្មើនឹងប្រមាណ៥៥.៥លានដុល្លារ) De Beek បានចូលលេងក្រោមការដឹកនាំរបស់លោកគ្រូបង្វឹក Ole Gunnar Solskjaer ក្នុងពាន Premier League បាន២ដងគត់ ប៉ុន្តែលោក De Boer ដែលជាអ្នកជិតដិតនឹង Van De beek បានបង្ហើបពីអារម្មណ៍របស់ខ្សែបម្រើម្នាក់នេះថា៖

ខ្ញុំបាននិយាយជាមួយ De beek ហើយគេថារឿងដែលគេចាកចេញនោះគឺមិនពិតទេ គេមិនបាននិយាយអីទាំងអស់។គេកំពុងផ្ដោតលើការព្យាបាលរបួសឲ្យឆាប់ជាសះស្បើយ ហើយវាមិនមែនជាការពិតទេដែលគេបានស្នើសុំចាកចេញពី Man UTD ។ ភ្នាក់ងាររបស់គេបានប្រាប់ខ្ញុំថា គេមិនសូវសប្បាយចិត្តពេលមិនបានចូលលេង ដែលគេបានចូលប្រកួតក្នុងក្របខណ្ឌ Premier League តែ២ប្រកួតគត់ ប៉ុន្តែយ៉ាងណាមិញគេមិនបានខ្វាយខ្វល់អ្វីនោះឡើយ តែគេចង់ចូលលេងឲ្យបានញឹកញាប់។ ពួកយើងនឹងរង់ចាំមើលថាមានអ្វីកើតឡើងលើគេនៅឆ្នាំក្រោយ ប្រហែលជាគេបន្តស្នាក់នៅជាមួយ Manchester United ព្រោះគេបានប្រាប់លោកគ្រូបង្វឹក (Ole Gunnar Solskjaer) ថា គេសប្បាយចិត្តនឹងស្នាក់នៅទីនោះព្រោះក្លិបជាក្លិបដ៏ល្អមួយ អ្នកទាំងអស់នៅទីនោះល្អចំពោះគេណាស់ គេមានអារម្មណ៍ជ្រួតជ្រាបក្ដីស្រឡាញ់ពីគ្រប់គ្នា៕
— លោក Ronald De Boer

ខ្សែបម្រើ Donny Van De Beek និងលោកគ្រូបង្វឹក Ole Gunnar Solskjaer

ប្រភព៖ metro

អានបន្ថែម