ថាម៉េច? ក្លិបនៅ Serie A មួយនេះចង់យក Ronaldo ទៅរួមក្រុម

អ៊ីតាលី៖ ក្លិប AS Roma ដែលដឹកនាំដោយលោក Jose Mourinho ត្រូវបានគេរាយការណ៍ថាចង់បានខ្សែប្រយុទ្ធ Cristiano Ronaldo ទៅរួមក្រុម នេះបើយោងតាមសារព័ត៌មាន Messaggero ។​

ក្រុមបិសាចក្រហម Manchester United ដែល Ronaldo កំពុងលេងឲ្យ បានតែងតាំងលោក Erik Ten Hag ជាគ្រូបង្វឹកផ្លូវការចាប់ពីរដូវកាលក្រោយទៅ ដោយលោកគ្រោងនឹងរុះរើក្រុមឡើងវិញ ដោយកីឡាករមួយចំនួនដូចជា Paul Pogba, Edinson Cavani, Juan Mata, Nemanja Matic, Jesse Lingard និង Phil Jones សុទ្ធតែត្រូវគេរំពឹងទុកថានឹងចាកចេញពីក្លិប។

​យ៉ាងណាមិញអនាគតរបស់ Ronaldo នៅទឹកដី Old Trafford ក៏មានភាពស្រពេចស្រពិលដែរបើទោះបីជា លោក Ten Hag ចង់ឲ្យគេស្នាក់នៅបន្តក្នុងក្រុមក៏ដោយហើយពេលនេះលេចឮថា Roma ដែលទើបនឹងលើកពាន Europa Conference League រួចនោះ ចង់ទាក់ទងយកខ្សែប្រយុទ្ធសញ្ជាតិព័រទុយកាល់រូបនេះដោយសារលោក Jose Mourinho ធ្លាប់ជាអតីតគ្រូរបស់ Ronaldo នៅ Real Madrid ។

​Cristiano Ronaldo នៅសល់កុងត្រាស្នាក់នៅទឹកដី Old Trafford ចំនួន១ឆ្នាំទៀតដោយនៅរដូវកាលនេះគេស៊ុតបញ្ចូលទីបាន២៤គ្រាប់ក្នុងការបង្ហាញខ្លួន៣៩ប្រកួត៕

ប្រភព៖​ sportskeeda