អុញនោះ! Man UTD ទំនងជាបង្ខំចិត្តរក្សាទុកកីឡាករម្នាក់នេះព្រោះគ្មានក្លិបណាទិញយក

អង់គ្លេស៖ ក្លិប Manchester United អាចនឹងបង្ខំចិត្តរក្សាទុកខ្សែប្រយុទ្ធ Anthony Martial នៅរដូវក្ដៅនេះបន្ទាប់ពីគ្មានក្លិបណាបង្ហាញការចាប់អារម្មណ៍ចង់បានគេនោះឡើយ។

Martial បានចំណាយពេលខ្ចីជើងនៅក្លិប Sevilla កាលពីពាក់កណ្ដាលរដូវកាលមុនប៉ុន្តែរូបគេស៊ុតបញ្ចូលទីបានតែ១គ្រាប់គត់ហើយ Sevilla នឹងមិនទិញផ្ដាច់កីឡាកររូបនេះឡើយ។

យ៉ាងណាមិញបើងាកមកមើលនៅ Manchester United វិញគឺគេបង្ហាញខ្លួនបានតែ១១ប្រកួតនិងស៊ុតបញ្ចូលទី១គ្រាប់គត់កាលពីរដូវកាលមុននិងត្រូវគ្រូបង្វឹកដាក់ឲ្យអង្គុយកៅអីបម្រុងដោយជ្រើសយក  Marcus Rashford, Anthony Elanga និង Jadon Sancho ជំនួស។

លោក Erik Ten Hag ដែលជាគ្រូតែងតាំងថ្មីរបស់ Man United ជិតនឹងទិញបានខ្សែប្រយុទ្ធ Anthony ដែលជាអតីតកូនសិស្សនៅ Ajax ហើយដែលធ្វើឲ្យឱកាសនៃការបង្ហាញខ្លួនរបស់ Martial កាន់តែមានតិច។

ដូច្នេះ Anthony Martial អាចនឹងអង្គុយបម្រុងមួយរដូវកាលទៀត ខណៈកុងត្រារបស់គេមានសុពុលភាពរហូតដល់ឆ្នាំ២០២៤៕

ប្រភព៖​ sportskeeda