អ៊ីចឹងសោះ! មុន Real Madrid ហៅ Ancelotti មកដឹកនាំគឺក្លិបព្យាយាមទាក់ទងទៅគ្រូបង្វឹករូបនេះ

អេស្ប៉ាញ៖ យោងតាមសេចក្ដីរាយការណ៍ពីសារព័ត៌មាន The Telegraph គឺ ក្លិបអធិរាជស Real Madrid បានទាក់ទងទៅលោកគ្រូបង្វឹក Jose Mourinho ដើម្បីហៅមកដឹកនាំជំនួស លោកគ្រូបង្វឹក Zinedine Zidane មុនពេលដែលទាក់ទងទៅ Carlo Ancelotti ឲ្យមកដឹកនាំជាផ្លូវការ។

កាលពីសប្តាហ៍មុន Real Madrid ត្រូវបានគេជឿថាបានព្យាយាមចរចាហៅ អតីតគ្រូ Spurs រូបនេះមកកាន់ទឹកដី Santiago Bernabeu ប៉ុន្តែ Jose Mourinho បានបដិសេធដោយឲ្យហេតុផលថាលោកគ្រូគ្មានបំណងចង់វិលមកដឹកនាំក្លិបម្ចាស់ពាន UCL ១៣សម័យនេះវិញឡើយ។ ម្យ៉ាងទៀត លោកគ្រូក៏បានព្រមព្រៀងជាមួយក្លិប Roma ថានឹងទៅដឹកនាំជាផ្លូវការចាប់ពីរដូវកាលក្រោយទៅផងដែរ។

ដូច្នេះ Real Madrid ក៏បង្វែរទៅរកលោកគ្រូបង្វឹក Carlo Ancelotti ដែលជាអតីតគ្រូនៅ Everton ឲ្យមកដឹកនាំជាផ្លូវការដែលលោកគ្រូរីករាយនឹងផ្ដាច់កុងត្រាជាមួយ Everton មុនពេលកំណត់។

Carlo Ancelotti ធ្លាប់ដឹកនាំ Real Madrid កំលុងឆ្នាំ២០១៣ ដល់ ២០១៥ ដោយបានជួយឲ្យក្លិបលើកពាន Champions League ទៀតផង។

ឯ Jose Mourinho វិញធ្លាប់ដឹកនាំក្រុមនេះចន្លោះពីឆ្នាំ២០១០ រហូតដល់ឆ្នាំ២០១៣៕

ប្រភព៖​ thesun