ម្នាយអើយ! មានក្លិបនៅតំបន់ អឺរ៉ុប រហូតដល់ទៅ ១០ កំពុងតាមចែចូវយកតារារបស់ Man UTD រូបនេះ

បរទេស៖ ក្លិបបិសាចក្រហម Manchester United បានទទួលសំណើពីក្លិបច្រើនជាង ១០ នៅតំបន់ អឺរ៉ុប សម្រាប់ការផ្ទេរយកខ្សែប្រយុទ្ធ Anthony Elanga មុនទីផ្សារដោះដូរកីឡាករខែ មករា នេះត្រូវបិទបញ្ចប់។

Elanga ដែលបណ្តុះបណ្តាលឡើងចេញពីថ្នាលយុវជនរបស់ Man UTD ផ្ទាល់តែម្តង បានបង្ហាញការចាប់អារម្មណ៍ខ្លាំងកាលពីរដូវកាលមុន។ ប៉ុន្តែនៅរដូវកាលនេះខ្សែប្រយុទ្ធវ័យ ២០ ឆ្នាំហាក់មានការធ្លាក់ចុះបន្តិចក្រោមការដឹកនាំរបស់លោក Erik ten Hag ដោយគិតមកត្រឹមពេលនេះនៅ Premier League រូបគេទើបតែបង្ហាញខ្លួនបាន ៥ប្រកួតប៉ុណ្ណោះ។

ជាមួយគ្នានេះ Man UTD កំពុងមានបំណងចង់ដាក់ឱ្យរូបគេខ្ចីជើងទៅកាន់ក្រុមផ្សេងសិន ដើម្បីអាចមានឱកាសបង្ហាញខ្លួននៅលើទីលានបានជាប់លាប់។​ យ៉ាងណាមិញ ក្រោយមានដំណឹងបែបនេះក៏មិនខ្វះក្លិបដែលចង់បានរូបគេដែរ ដោយពេលនេះកំពុងមានក្លិបជាច្រើនដែលចង់បានខ្សែប្រយុទ្ធសញ្ជាតិ ស៊ុយអែត រូបនេះយកទៅរួមក្រុម។

យោងតាមការចុះផ្សាយរបស់អ្នកកាសែត អ៊ីតាលី Fabrizio Romano បានឱ្យដឹងថា ក្លិប Manchester United គឺបានទទួលសំណើពីក្លិបច្រើនជាង ១០ ដែលចង់បាន Elanga ហើយក្នុងនោះមានក្លិបដូចជា Borussia Dortmund, PSV និងក្លិបមួយចំនួនទៀតនៅក្នុងប្រទេស អ៊ីតាលី៕

ប្រភព៖​ Metro