លុយដែល «ប្រឡាក់ទឹករំអិលផ្លូវដង្ហើម» របស់អ្នកជំងឺកូវីដ១៩ អាចចម្លងវីរុសលឿនបំផុត តាមរបៀបនេះ
ថ្មីៗ អ្នកនាំពាក្យក្រសួងសុខាភិបាល លោកស្រី ឱ វណ្ណឌីនបានបញ្ជាក់ប្រាប់សាធារណជនថា កូវីដ១៩ អាចចម្លងតាមការប៉ះពាល់របស់របរប្រើប្រាស់ដែលអ្នកជំងឺកូវីដ១៩ បានកាន់រួចហុចបន្តមកបុគ្គលម្នាក់ទៀត។ ហើយក្រៅពីនោះ លុយក៏ជាភ្នាក់ងារដែលអាចចម្លងកូវីដ១៩ពីបុគ្គលម្នាក់ទៅម្នាក់ទៀតបានដែរ ក្នុងករណីក្រដាសប្រាក់នោះមាន «ប្រឡាក់ទឹករំអិលផ្លូវដង្ហើម»ពីអ្នកជំងឺ ហើយត្រូវបានបុគ្គលដទៃកាន់ រួចយកដៃមកប៉ះច្រមុះ មាត់ ភ្នែក ជាដើម។ នេះបើតាមការផ្សាយជាផ្លូវការពីទូរទស្សន៍ជាតិកម្ពុជា។
លោកស្រី ឱ វណ្ណឌីន ថា៖ «ប្រសិនបើបុគ្គលដែលមានវីរុសកូវីដ១៩យកដៃគាត់ជូតទឹករំអិលផ្លូវដង្ហើមដូចជា សំបោរ ឬស្លេសទឹកមាត់ ឬយកដៃខ្ទប់មាត់ពេលក្អកកណ្តាស់ ហើយមិនបានលាងដៃនឹងសាប៊ូ ឬអាល់កុល ឬទឹកជែលសម្រាប់លាងដៃ ភ្លាមៗទេនោះរួចយកដៃនោះមកកាន់ក្រដាសប្រាក់ គឺវីរុសកូវីដ១៩ នឹងតោងលើក្រដាស់ប្រាក់»។
លោកស្រីបន្តថា៖ «ហើយក្រដាសប្រាក់នោះ បានហុចបន្តទៅបុគ្គលម្នាក់ទៀតនៅពេលដែលបុគ្គលនោះចាប់កាន់ក្រដាសប្រាក់ វីរុសកូវីដ១៩ នឹងតោងមកដៃបុគ្គលនោះ។ ហើយបុគ្គលនោះយកដៃដែលកាន់ក្រដាសប្រាក់មានវីរុសនេះ មកប៉ះច្រមុះ មាត់ ភ្នែក ជាដើម ដែលធ្វើឲ្យមានការចម្លងបានលឿនជាទីបំផុត។បន្ទាប់មក ក៏មានការចម្លងបន្តៗគ្នា ប្រសិនបើមិនបាន លាងដៃ ពាក់ម៉ាស់ និងមានគម្លាតសុវត្ថិភាពបុគ្គលពីមួយម៉ែត្រកន្លះឡើងទៅ»។
សូមបញ្ជាក់ថា គិតមកទល់ថ្ងៃ ០៧ធ្នូនេះ កម្ពុជាមានករណីឆ្លងកូវីដ១៩សរុបចំនួន ៣៤៨ នាក់ (អ្នកឆ្លងក្នុងសហគមន៍ ៣២ នាក់) អ្នកជាសះស្បើយ ៣០៦ នាក់៕
