ភ្ញាក់ផ្អើល! គំនូរជីវចល ណារូតុ របស់ជប៉ុន ល្បីពេញពិភពលោក មានជាប់ទាក់ទងជំនឿជាច្រើន នៅក្នុងសង្គមខ្មែរ

កម្ពុជា៖ តាំងពីបុរាណកាលមក ប្រទេសកម្ពុជារបស់យើងបានទទួលឥទ្ធិពលពីប្រទេសឥណ្ឌារួមមានភាសានិងជំនឿសាសនា ដូចជាព្រហ្មញ្ញសាសនានិងពុទ្ធសាសនា។ជំនឿទាំងអស់នេះបានរក្សាទុកមកដល់បច្ចុប្បន្ន។ យ៉ាងណាមិញ គំនូរជីវចលរបស់ជប៉ុនណារូតុ ក៏បានផ្សារភ្ជាប់ជំនឿទាក់ទងនឹងសាសនាទាំងពីរនេះផងដែរ។

ដូច្នេះហើយទើបគេឃើញមានចំណុចស្រដៀងគ្នាជាច្រើន នៅក្នុងគំនូរជីវចលនេះ ដែលបានបំបែកជាទម្រង់ផ្សេងៗដែលមិនឲ្យដូចគ្នាទាំងស្រុងនៅក្នុងការប្រតិបត្តិរបស់ជីវភាពខ្មែរយើង។អ្វីកាន់តែភ្ញាក់ផ្អើល ប្រាសាទអង្គរវត្តក៏បង្ហាញវត្តមាននៅក្នុងរឿងណារូតុដែលគេដឹងហើយថា ប្រាសាទនេះជាវិមានសាសនាដ៏ធំរបស់ព្រហ្មញ្ញសាសនានិងនៅលើពិភពលោកផងដែរ។

គេឃើញមានជំនឿបុណ្យបាប បាននិម្មិតឡើងនៅក្នុងទម្រង់ជា «កាឡាផ្លូវ៦» (Six Paths Technique) របស់រឿងណារ៉ូតុ ដូចជាផ្លូវទេវតាផ្លូវអសុរ ផ្លូវមនុស្ស ផ្លូវសត្វ ផ្លូវប្រេត និងផ្លូវនរក។ ពាក្យ Chakra (ចក្រា) របស់ណារូតុ ក៏ជាពាក្យដែលស្ថិតនៅក្នុងការប្រើប្រាស់ប្រចាំថ្ងៃរបស់យើងដែរគឺពាក្យ «ចក្រ»។

មិនតែប៉ុណ្ណោះ Kage ទាំងប្រាំ (មេដឹកនាំនៅក្នុងភូមិឬមេភូមិ)គឺមានពាក់ព័ន្ធនឹងធាតុផ្សេងៗ ដែលជាអ្វីក៏ឃើញមាននៅក្នុងជំនឿពីបុរាណរបស់ខ្មែរយើងដែរដូចជា៖

·  Hokage ដែលមានន័យថា ជ្វាលាឆាយា (ស្រមោលភ្លើង)

·  Kazekage ដែលមានន័យថា វាយុឆាយា (ស្រមោលខ្យល់)

·  Mizukage ដែលមានន័យថា ជលឆាយា (ស្រមោលទឹក)

·  Raikage ដែលមានន័យថា វិជ្ជុឆាយា (ស្រមោលរន្ទះ)

·  Tsuchikage ដែលមានន័យថា ប្រឹថពី/ភូមិ/ភូឆាយា (ស្រមោលដី)

កែវភ្នែករបស់តួអង្គនៅក្នុងរឿងណារូតុក៏មានអត្ថន័យជាភាសាខ្មែរផងដែរថា៖

·  Sharingan មានន័យថា ប្រាតិចក្រានេត្រា

·  Rinnegan មានន័យថា សង្សារនេត្រា

·  Byakugan មានន័យថា ស្វេតនេត្រា

សរុបមក គំនូរជីវចលជប៉ុន ណារូតុមិនត្រឹមតែផ្ដល់ការកម្សាន្តតែមួយមុខនោះទេ ហើយនៅមានតម្លៃអប់រំនិងចំណុចសំខាន់ជាច្រើនដែលអ្នកតាមដានអាចយកទៅសិក្សាបន្ថែមបានថែមទៀត៕