ចំណាយពេល ៧ ឆ្នាំក្នុងវិស័យធានារ៉ាប់រងអាយុជីវិត ទីបំផុតស្ត្រីឆ្នើមម្នាក់បានក្លាយជាសមាជិកសមាគមហិរញ្ញវត្ថុលំដាប់ពិភពលោក MDRT

April 20, 2022

ភ្នំពេញ៖ គ្រាន់តែបញ្ចប់ត្រីមាសទីមួយក្នុងឆ្នាំ២០២២ ភ្លាម លោកស្រី រស់ សុវណ្ណារ៉ា បានក្លាយជាសមាជិកសមាគមលំដាប់ពិភពលោក កម្រិត MDRT(Million Dollar Round Table) ក្នុងឆ្នាំ ២០២៣ ដំបូងគេបង្អស់នៅក្រុមហ៊ុនធានារ៉ាប់រងអាយុជីវិតFWD Cambodia។លោកស្រីបានបំពេញគ្រប់លក្ខខណ្ឌតម្រូវពីស្ថាប័នអន្តរជាតិ ដែលទទួលស្គាល់បុគ្គលឆ្នើមផ្នែកហិរញ្ញវត្ថុមួយនេះ ដោយចំណាយពេលត្រឹមតែ៦៧ ថ្ងៃប៉ុណ្ណោះ ដោយផ្អែកទាំងស្រុងលើទំហំបុព្វលាភរ៉ាប់រង (ទឹកប្រាក់ធានារ៉ាប់រងដែលអតិថិជនបង់)។

លោកស្រីរស់ សុវណ្ណារ៉ា បានសម្តែងក្តីរីករាយយ៉ាងខ្លាំង ហើយមានប្រសាសន៍ថា៖

« ក្នុងរយៈពេល ៧ឆ្នាំនៅក្នុងវិស័យធានារ៉ាប់រងអាយុជីវិតនេះជាសមិទ្ធផលធំបំផុតដែលខ្ញុំសម្រេចបាន ។ សមាជិកភាព MDRT តែងតែជាក្ដីស្រមៃមួយដែលខ្ញុំមិនដែលបោះបង់ចោលទេក្នុងរយៈពេល៧ ឆ្នាំកន្លងមកនេះ ព្រោះខ្ញុំជឿថា ខ្ញុំនឹងអាចធ្វើវាបាននៅថ្ងៃណាមួយ។ខ្ញុំពិតជាមានក្ដីរំភើបក្រៃលែងដែលក្ដីសុបិននេះបានក្លាយជាការពិត តាមរយៈការបន្តការខិតខំប្រឹងប្រែងព្រមទាំងការជួយជ្រោមជ្រែងពីក្រុមគ្រួសារ និងក្រុមការងារជាពិសេសថ្នាក់ដឹកនាំរបស់ក្រុមហ៊ុន។ »
— ប្រសាសន៍លោកស្រី រស់ សុវណ្ណារ៉ា

លោកគី វិសាល ជាស្វាមីរបស់លោកស្រី រស់ សុវណ្ណារ៉ា បានលើកឡើងថា៖

« ខ្ញុំពិតជារំភើប និងមានមោទនភាពខ្លាំងណាស់ចំពោះភរិយារបស់ខ្ញុំ ដែលទទួលបានភាពជោគជ័យដ៏ធំនេះ ព្រោះខ្ញុំដឹងថានេះជាក្ដីស្រមៃមួយដែលគាត់តែងតែចង់បាន ហើយគាត់ពិតជាខិតខំប្រឹងប្រែងខ្លាំងក្នុងការងាររបស់គាត់បន្ថែមលើកាតព្វកិច្ចជាភរិយា និងជាម្ដាយរបស់កូនៗទាំងពីរ។ »
— ប្រសាសន៍លោក គី វិសាល

លោក ចាន់ រដ្ឋា អគ្គនាយកក្រុមហ៊ុនធានារ៉ាប់រងអាយុជីវិតFWD Cambodia បានមានប្រសាសន៍ថា៖

« ខ្ញុំសូមអបអរសាទរចំពោះ លោកស្រី រស់ សុវណ្ណារ៉ា ហើយខ្ញុំមានមោទនភាពយ៉ាងខ្លាំងចំពោះលោកស្រី ក៏ដូចជាក្រុមការងារទាំងអស់ដែលបានប្រឹងប្រែងយ៉ាងសស្រាក់សស្រាំក្នុងការផ្តល់ជូនបទពិសោធថ្មីលើសេវាកម្មធានារ៉ាប់រងជូនដល់ប្រជាជនកម្ពុជា។សមិទ្ធផលមួយនេះបានឆ្លុះបញ្ចាំងឱ្យឃើញពីការតស៊ូរបស់ស្ត្រីម្នាក់ដែលមិនរាថយទោះត្រូវចំណាយពេលប៉ុនណាក៏ដោយ ហើយទីបំផុតគាត់ពិតជាអាចធ្វើបាន។ »
— ប្រសាសន៍លោក ចាន់ រដ្ឋា

អានបន្ថែម