ត្រូវប្រយ័ត្ន! WHO ថា ហានិភ័យបង្ករឡើងដោយវីរុសអូមីក្រុង នៅមានកម្រិតខ្ពស់ណាស់

បរទេស៖ អង្គការសុខភាពពិភពលោក (WHO) បាននិយាយនៅថ្ងៃពុធ​នេះថា ហានិភ័យដែលបង្កឡើងដោយវីរុសបំប្លែងថ្មីអូមីក្រុង (Omicron) នៅតែមានកម្រិតខ្ពស់ណាស់ បន្ទាប់ពីចំនួនករណីឆ្លងកូវីដ១៩ បានកើនឡើង ១១ភាគរយនៅទូទាំងពិភពលោក កាលពីសប្តាហ៍មុន។ នេះបើតាមប្រភពព័ត៌មាន CNA។

នៅក្នុងការធ្វើបច្ចុប្បន្នភាពរោគរាតត្បាតប្រចាំសប្តាហ៍អំពីកូវីដ១៩អង្គការសុខភាពពិភពលោក​គូសបញ្ជាក់ថា វីរុស Omicron គឺស្ថិតនៅពីក្រោយការរីករាលដាល​យ៉ាងឆាប់រហ័សនៅ​បណ្តាប្រទេសជាច្រើន រួមទាំងប្រទេស​ដែលធ្លាប់មានករណីឆ្លងវីរុសប្រភេទ Delta ខ្លាំងជាង​ពីមុនមក។

ទន្ទឹមនោះ ទីភ្នាក់ងារសុខភាពអង្គការសហប្រជាជាតិ (UN) ក៏បានលើកឡើងថាហានិភ័យជារួម ទាក់ទងនឹង​វីរុសបំប្លែងថ្មី Omicron នៅតែមានកម្រិតខ្ពស់។ ​កំណើនឡើនៃករណីឆ្លងយ៉ាងឆាប់រហ័ស ទំនង​ដោយសារតែ​ការធ្លាក់ចុះនៃប្រព័ន្ធភាពសុំាក៏ដូចជាការបង្កើនសមត្ថភាពចម្លងរបស់វីរុសនេះផ្ទាល់តែម្តង។

ទោះជាយ៉ាងណាក៏ដោយ WHO បានគូសបញ្ជាក់ពីការថយចុះ​ ករណី​ឆ្លងនៅអាហ្រ្វិកខាងត្បូងដល់ទៅ​ ២៩ភាគរយ ដែលជាប្រទេស​បានរាយការណ៍ពី​វីរុសថ្មីនេះដំបូងគេ ទៅកាន់ WHOកាលពីថ្ងៃទី ២៤ ខែវិច្ឆិកា៕