ក្តៅៗ! ​​វៀតណាម ​រកឃើញករណី​ឆ្លង​​វីរុសថ្មីអូមីក្រុង ជាលើកដំបូង

ហាណូយ៖ ក្រសួងសុខាភិបាលវៀតណាម ​ប្រកាសនៅថ្ងៃអង្គារនេះថា ប្រទេសវៀតណាមបានកត់ត្រាករណីវីរុសបំប្លែងខ្លួនថ្មី ប្រភេទអូមីក្រុង(Omicron) ជាលើកដំបូង លើកមនុស្សម្នាក់ដែលធ្វើដំណើរពីចក្រភពអង់គ្លេស ហើយចូលមកដល់ទីក្រុងហាណូយ។ នេះបើតាមប្រភពព័ត៌មាន vnexpress ។

អ្នកឆ្លងជំងឺ ​​បាន​ចុះ​ចត​នៅ​អាកាសយានដ្ឋាន Noi Bai ទីក្រុង​ហាណូយ ​នៅ​ថ្ងៃ​ទី ១៩ ខែ​ធ្នូ ហើយ​ធ្វើ​តេស្ត​ឃើញ​មាន​ផ្ទុក​​​កូវីដ១៩និងត្រូវ​បញ្ជូន​ទៅ​កាន់​មន្ទីរពេទ្យ​យោធភូមិភាគ ១០៨ ភ្លាមៗ។ យ៉ាងណាមិញ តាម​លទ្ធផលវិភាគសំណាក​នៅថ្ងៃទី ២០ ខែធ្នូ និងថ្ងៃទី ២១ ខែធ្នូ បានបញ្ជាក់ថា មនុស្សនោះឆ្លង​ជំងឺកូវីដ១៩ ប្រភេទអូមីក្រុងឬ B.1.1.529 ។

គួររម្លឹកថា វីរុសបំប្លែងថ្មី Omicron ត្រូវបាន​រកឃើញជាលើកដំបូងបង្អស់នៅចុងខែវិច្ឆិកា ហើយមកដល់ពេលនេះវាបានឆ្លងរាលដាលដល់បណ្តាប្រទេសជាច្រើននៅទូទាំងពិភពលោក៕