កូរ៉េខាងត្បូង ប្រកាសរកឃើញករណីឆ្លងវីរុសកូវីដបំប្លែងខ្លួនថ្មី ប្រភេទ Delta Plus ជាលើកដំបូង

សេអ៊ូល៖ ទីភ្នាក់ងារគ្រប់គ្រង និងបង្ការជំងឺរបស់កូរ៉េ ហៅកាត់ (KDCA) បាន​ប្រកាសកាលពីថ្ងៃអង្គារទី៣ ខែសីហា​ ថា ប្រទេសកូរ៉េខាងត្បូងបានរកឃើញករណីឆ្លងវីរុសកូវីដ១៩បំប្លែងខ្លួនថ្មីប្រភេទ Delta Plus ​ខណៈប្រទេសនេះកំពុងប្រយុទ្ធប្រឆាំងនឹងរលកទី៤នៃការឆ្លងរាលដាលទូទាំងប្រទេស។ នេះបើតាមប្រភពព័ត៌មាន CNA។

វីរុស​ DeltaPlus គឺចេញពីពូជ​វីរុសបំប្លែងខ្លួន​ Delta ដែលត្រូវបានរកឃើញដំបូងនៅប្រទេសឥណ្ឌាហើយមានកំឡាយសរសៃប្រូតេអ៊ីនឈ្មោះ K417N ដែលកំឡាយនេះក៏ត្រូវបានគេរកឃើញនៅក្នុងវីរុសបំប្លែងខ្លួនអាហ្វ្រិកខាងត្បូង Beta ផងដែរ។ 

បើតាមប្រភពព័ត៌មាន Reutersក៏បានឱ្យដឹងដែរថាករណីឆ្លង​ទី១ នៅកូរ៉េខាងត្បូង គឺត្រូវបានរកឃើញទៅលើបុរសម្នាក់ ​មានអាយុ ៤០ឆ្នាំ ដែលមិនមានកំណត់ត្រាធ្វើដំណើរចេញទៅក្រៅប្រទេសសោះនៅពេលថ្មីៗនេះ​ ហើយក្នុងនោះ ប្រភព​នៃការឆ្លងរាលដាល់ ក៏កំពុងស្ថិតក្រោមការស៊ើបអង្កេតផងដែរ៕

មន្រ្តី KDCA បានប្រាប់សន្និសីទខ្លីមួយថា លទ្ធផលតេស្តទៅលើមនុស្សប្រហែល ២៨០នាក់ ដែលមានទំនាក់ទំនងជាមួយបុរសនោះ​ គឺមានតែកូនប្រុសរបស់គាត់ម្នាក់ប៉ុណ្ណោះ ដែលមានវិជ្ជមាន ប៉ុន្តែគេមិនទាន់ដឹងច្បាស់នៅឡើយទេ ថាតើកូនប្រុសរបស់គាត់ ​ឆ្លង​វីរុសប្រភេទ Delta Plus ដែរ ឬ​ក៏យ៉ាងណា។ ដោយឡែក ករណីទី២ ត្រូវបានរកឃើញ​លើអ្នកដំណើរម្នាក់ ដែលត្រឡប់មកពីសហរដ្ឋអាមេរិក​ ហើយ​បុគ្គលនោះ ក៏​បានចាក់វ៉ាក់សាំង​ AstraZeneca ចំនួន ២ដូស រួចទៅហើយ មុនពេលធ្វើដំណើរ។

តាមរបាយការណ៍បញ្ជាក់ថា ករណីឆ្លងវីរុសបំប្លែងខ្លួន Delta Plus គឺមានតិចតួចណាស់ ដែលរហូតមកដល់ពេលនេះ​ មានប្រទេសមួយចំនួនតូចប៉ុណ្ណោះ រួមបញ្ចូលទាំងអង់គ្លេស ព័រទុយកាល់ និងឥណ្ឌា បានរាយការណ៍ករណី​ឆ្លងមួយចំនួន នៃរីរុសប្រភេទនេះ៕