ទីក្រុងប៉េកាំង ជំរុញមនុស្សរាប់លាននាក់ឱ្យធ្វើការពីផ្ទះ ដើម្បីប្រឆាំងការរាតត្បាតកូវីដ១៩
ប៉េកាំង៖ ក្រោយឈប់សម្រាកថ្ងៃបុណ្យរួចមក ប្រជាជនរាប់លាននាក់នៅទីក្រុងប៉េកាំងនៅថ្ងៃព្រហស្បតិ៍នេះ បានចូលធ្វើការវិញ ប៉ុន្តែភាគច្រើនធ្វើការពីផ្ទះ ស្របពេលដែលស្ថានីយ៍រថភ្លើងក្រោមដីជាច្រើន ត្រូវបានបិទដំណើរការដើម្បីទប់ស្កាត់ការឆ្លងរាលដាលនៃជំងឺកូវីដ១៩។ នេះបើតាមប្រភពព័ត៌មាន CNA។
ទីក្រុងប៉េកាំងបានរាយការណ៍ករណីឆ្លងជំងឺកូវីដ១៩ចំនួន ៥០ករណីនៅថ្ងៃព្រហស្បតិ៍នេះ បន្ទាប់ពីអាជ្ញាធរបាននិយាយថាប្រជាជននៅក្នុងសង្កាត់ Chaoyang ដែលជាសង្កាត់មានប្រជាជនច្រើនបំផុត គួរតែធ្វើការពីផ្ទះ។ យ៉ាងណាមិញ សម្រាប់អ្នកដែលទៅធ្វើការនៅការិយាល័យ ត្រូវបានលើកទឹកចិត្តឱ្យធ្វើដំណើរតាមមធ្យោបាយផ្ទាល់ខ្លួននិងជៀសវាងការជួបជុំគ្នា។
ដោយឡែក អាជ្ញាធរនៅសង្កាត់ Tongzhou ក៏បានលើកទឹកចិត្តប្រជាជនឱ្យធ្វើការនៅផ្ទះផងដែរ ស្របពេលដែលស្ថានីយ៍រថភ្លើងក្រោមដីរាប់សិបនៅទូទាំងទីក្រុង នៅតែបន្តបិទដំណើរការ។
គួរឱ្យដឹងដែរថា អាជ្ញាធរចិនបានសង្កត់ធ្ងន់លើគោលនយោបាយ «សូន្យកូវីដ» តាមរយៈការអនុវត្តវិធានការបិទខ្ទប់និងធ្វើតេស្តទ្រង់ទ្រាយធំ ក្នុងគោលដៅប្រយុទ្ធប្រឆាំងទៅនឹងការផ្ទុះឡើងដ៏ធំបំផុត ចាប់តាំងពីថ្ងៃដំបូងនៃជំងឺរាតត្បាតមក៕
