ក្រុមហ៊ុន អ៊ីអេហ្វជី (EFG) បានរៀបចំប្រារព្ធកម្មវិធី «ទិវា អ៊ីអេហ្វជី» ឆ្នាំលើកទី៩

ភ្នំពេញ៖ ក្រុមហ៊ុន អ៊ីអេហ្វជី (EFG) បានរៀបចំប្រារព្ធកម្មវិធី ទិវា អ៊ីអេហ្វជី ឆ្នាំលើកទី៩ នៅថ្ងៃទី១ ខែឧសភា ឆ្នាំ២០២២ ថ្មីៗនេះ។ កម្មវិធីនេះបានរៀបចំឡើងក្នុងគោលបំណងដើម្បី ពង្រឹងទំនាក់ទំនងរវាងប្រធានប្រតិបត្តិ ប្រធានគ្រប់គ្រង ប្រធានផ្នែកផ្សេងៗ បុគ្គលិកការិយាល័យ និងបុគ្គលិកតាមហាងអោយកាន់តែស្និតស្នាល។

ទិវានេះ ដោយមានការចូលរួមដោយ អគ្គនាយកក្រុមហ៊ុន​ នាយកប្រតិបត្តិការ អ្នកគ្រប់គ្រងទូទៅ ប្រធានគ្រប់គ្រងម៉ាក ប្រធានផ្នែកទីផ្សារ និងបុគ្គលិកទាំងអស់។ កម្មវិធីតម្រូវអោយចំណាយពេលពេញមួយថ្ងៃធ្វើការនៅក្នុងហាងផ្ទាល់របស់ក្រុមហ៊ុនអ៊ីអេហ្វជី នៅទូទាំងរាជធានីភ្នំពេញទាំងអស់ នឹងមានការចូលរួមទៅតាមគ្រប់ទីតាំងម៉ាកទាំងអស់ដូចជាដឹភីហ្សាខមផេនី​​ (The Pizza Company), ​ការ៉េមស្វិនសិន(Swensen’s)​ , ឌីឃ្យូ(DQ) , ​គ្រីសស្ពី គ្រីម( Krispy Kreme ) , បាប៊ីឃ្យូ ប្លាហ្សា( Bar B Q Plaza ), ដឹកូហ្វី ក្លិប ( The CoffeeClub ) អ៊ីតធូហ្គេតដ័រ(EatTogether), បាយភូមិ(Bay Phum), និង ហាំងគ្រីឃីតឆិន(Hungry Kitchen ) ជាដើម។

ទោះបីជាទិវានេះស្របចំថ្ងៃទិវាពលកម្មអន្តរជាតិ ដែលជាថ្ងៃឈប់សំរាកក៏ដោយ តែបុគ្គលិករបស់ក្រុមហ៊ុនអ៊ីអេហ្វជីកម្ពុជា ស្នាក់ការកណ្ដាលទាំងអស់ស្ម័គ្រចិត្តចូលរួមយ៉ាងសកម្មនៅក្នុងហាងដោយផ្ទាល់ រួមមានសកម្មភាពដូចជា ការចំអិនអាហារ ការធ្វើភីហ្សា ការធ្វើការ៉េ ការធ្វើនំដូហ្វណាត់ ការរក្សាទុកអាហារឲ្យមានអនាម័យ និងសុវត្ថិភាពព្រមទាំងរៀបចំតុ កៅអី ការប្រាស្រ័យទាក់ទង ការស្វាគមន៍​និងការទទួលកម្មង់ពីអតិថិជនជាដើម។

លើសពីនេះ ទិវានេះបានផ្តល់ឱកាសអោយមានយល់ដឹងពីជីវភាពរស់នៅ របស់បុគ្គលិកជួរមុខឬបុគ្គលិកក្នុងហាងទាំងអស់ពីរបៀបដែលពួកគាត់ធ្វើការបំរើសេវាកម្មនៅក្នុងហាងការទំនាក់ទំនងជាមួយអតិថិជន ការបរិភោគអាហារ ការជួបបញ្ហាប្រឈមមុខ ផ្សេងៗឬបញ្ហាលើការធ្វើប្រតិបត្តិការប្រចាំថ្ងៃនានា និង វិធីដោះស្រាយបញ្ហា ជាដើម។ មិនតែប៉ុណ្ណោះបុគ្គលិកក្នុងហាងអាចយល់ពីឆន្ទះរបស់ថ្នាក់ដឹកនាំរបស់ខ្លួន ថែមទាំងគ្រប់គ្នាអាចផ្លាស់ប្តូរព័ត៌មានជាមួយគ្នាផ្ទាល់រៀនពីគ្នាទៅវិញទៅមកនូវបទពិសោធន៏ថ្មីៗផ្សេងៗ មានការជជែកកំសាន្ត ការបង្ហាញពីអារម្មណ៏ពិត និងការផ្តល់យោបល់ផ្សេងៗពីគ្នាទៅវិញទៅមក។​

លោក ទេព វិរៈនាយកគ្រប់គ្រងទូទៅនៃក្រុមហ៊ុន អ៊ីអេហ្វជីកម្ពុជាបានលើកឡើងដែរថា នេះជាឱកាសដ៏ល្អមួយដើម្បីទទួលយកបទពិសោធន៍ ការងារប្រចាំថ្ងៃជាមួយនឹងសហការីជួរខាងមុខនិងអ្វីដែលសំខាន់ជាងនេះគឺ ដើម្បីមានឱកាសអោយលោកក៏ដូចជាបុគ្គលិកការិយាល័យទាំងអស់ អាចបម្រើសេវាកម្មជូនអតិថិជនដោយផ្ទាល់។ ជាពិសេសលោកបានទទួលបានប្រយោជន៍យ៉ាងច្រើន ពីសកម្មភាពនេះ ព្រោះលោកអាចចូលមកកាន់តែជិតស្និទ្ធជាមួយបុគ្គលិកនៅហាងផ្ទាល់មានការជជែកបែបមិត្តភ័ក្ដ អាចស្ដាប់យល់ដឹងកាន់តែច្រើនពីគ្នា ពីបញ្ហាដែលពួកគាត់បានជួបប្រទះ ដើម្បីកែលម្អការងារអោយកាន់តែប្រសើរឡើង ។​ ហើយថែមទាំងលោកអាចសិក្សាពីតម្រូវការជាក់ស្តែងរបស់បុគ្គលិកជួរមុខទាំងអស់ផងដែរ។​

ជាពិសេសចំពោះបុគ្គលិកការិយាល័យទាំងអស់ បើទោះបីជាពួកគេធ្លាប់តែជាអ្នកផ្ដល់យោបល់ដំបូន្មានដើម្បីផ្ដល់សេវាកម្មប្រសើរ គុណភាពខ្ពស់ដល់អតិថិជនតែសម្រាប់ថ្ងៃនេះ ពួកគាត់ត្រូវបានសហសេវិកណែនាំវិញម្តងព្រមទាំងលោកផងដែរ។ លោកពិតមានអារម្មណ៏សប្បាយរីករាយជាមួយនឹងសកម្មភាពទាំងនេះ នៅថ្ងៃទិវា អ៊ីអេហ្វជី ហើយលោកនឹងចូលរួមនៅឆ្នាំក្រោយៗ នៅហាងផ្សេងៗទៀត ។

លោក ទេព វិរៈ ក៏បានបន្ថែមថាការធ្វើបែបនេះឆ្លុះបញ្ចាំងពីការធ្វើការងារជាក្រុមនិងរួមគ្នា ការរៀនសូត្រពីគ្នាទៅវិញទៅមកទាំងថ្នាក់លើនិងថ្នាក់ក្រោមដោយប្រកាន់ខ្ជាប់ទៅតាមគោលការណ៍ច្បាស់លាស់របស់ក្រុមហ៊ុនស្របតាមពាក្យស្លោក បុគ្គលិករីករាយ​ អតិថិជនរីករាយ​។

ព័ត៍មានបន្ថែមទៀតអំពីក្រុមហ៊ុន អិចប្រេចហ្វូដគ្រុប (ExpressFood Group) រឺ​ ក្រុមហ៊ុនអ៊ីអេហ្វជី(EFG)https://efg.rmagroup.net/about-efg/

ក្រុមហ៊ុន អ៊ី អេហ្វ ជី មានទីស្នាក់ការកណ្ដាលនៅទីក្រុងបាងកកក្រុមហ៊ុនមានបុគ្គលិកជាង ១,៣០០ នាក់ និងមានប្រត្តិបត្តិការនៅ៣ប្រទេសរួមមានប្រទេសកម្ពុជា ប្រទេសមីយ៉ាន់ម៉ានិងប្រទេសឡាវ។ ក្រុមហ៊ុន អ៊ី អេហ្វ ជី គឺជាដៃគូជម្រើសអាជីវកម្មសម្រាប់ម៉ាកយីហោម្ហូបនិងភេសជ្ជៈឈានមុខគេនៅអាស៊ីអាគ្នេយ៍ ដែលកន្លងមក ទទួលបានសិទ្ធផ្តាច់មុខបើកអាជីវកម្មជាមួយក្រុមហ៊ុនអន្តរជាតិមួយចំនួនដូចជា ម៉ាយណឺហ្វូដអ៊ីនធឺនែសសិនណល់, ហ្វូដផាសសិនគ្រុប, អ៊ីនធឺនែសសិនណល់ដាយរីឃ្វីន​, គ្រីសស្ពីគ្រីម,​ តិចសាស៏(ឆើចស៏)ឆីតឃីន​(Texas ​(Church's) Chicken) សម្រាប់ប្រទេសឡាវ។ នៅឆ្នាំ២០២១ ក្រុមហ៊ុន អ៊ី អេហ្វ ជី កម្ពុជា (EFG​ Cambodia) បានទទួលនួវភាពជោគជ័យមួយទៀតដោយទទួលបានពានរង្វាន់ ជាក្រុមហ៊ុនដែលល្អបំផុតសម្រាប់ធ្វើការដោយក្រុមហ៊ុនធនធានមនុស្សអាស៊ី “ The Best Company to work 2021 for​ by HR Asia” ៕