ចិន​​ធ្វើតេស្ត​ប្រជាជន ១១លាននាក់ក្នុងទីក្រុងមួយ ខណៈលេចវត្តមានជំងឺកូវីដ១៩ឡើងវិញ

ចិន៖ អាជ្ញាធរ​ទីក្រុងវូហាន នៅថ្ងៃអង្គារនេះ ​បាននិយាយថា ​នឹងធ្វើតេស្ត​រកមេរោគលើប្រជាជនរបស់ខ្លួនទាំងមូលបន្ទាប់ពីទីក្រុងភាគកណ្តាលប្រទេសចិនមួយនេះ ​បានរាយការណ៍​ពីឆ្លងមេរោគកូវីដ១៩ ក្នុង​សហគមន៍ជាលើកដំបូង​ក្រោយស្ងប់ស្ងាត់អស់រយៈជាងមួយឆ្នាំកន្លងមក។ នេះបើតាមប្រភពព័ត៌មាន CNA។

មន្រ្តីជាន់ខ្ពស់ទីក្រុងវូហាន លោក Li Tao  បានថ្លែងនៅក្នុងសន្និសីទសារព័ត៌មានមួយនៅថ្ងៃអង្គារនេះថាទីក្រុងដែលមានប្រជាជនចំនួន ១១លាននាក់ កំពុងចាប់ផ្តើមធ្វើតេស្តយ៉ាងឆាប់រហ័ស​។ ករណីឆ្លងមេរោគកូវីដ១៩ ក្នុងសហគមន៍ចំនួន ៧ករណីត្រូវបានរកឃើញក្នុងចំណោម​ពលករចំណាកស្រុកនៅក្នុងទីក្រុង ​ដែលជាការបំបែកកំណត់ត្រារយៈពេលមួយឆ្នាំដោយគ្មានករណីក្នុង​សហគមន៍សម្រាប់ទីក្រុងមួយនេះ។ យ៉ាងណាមិញ ​អាជ្ញាធរចិនបានបង្ខាំងប្រជាជនក្នុងទីក្រុងទាំងអស់ឱ្យនៅក្នុងគេហដ្ឋានរបស់ពួកគេដើម្បីកាត់ផ្តាច់​ការចម្លងរាលដាល និង​ចាប់ផ្តើមដំណើរការធ្វើតេស្ត​ទ្រង់ទ្រាយធំក្នុងរយៈពេលប៉ុន្មានថ្ងៃចុងក្រោយនេះ។

គួរឱ្យដឹងដែរថា ​ថ្ងៃអង្គារនេះ ប្រទេសចិនបានរាយការណ៍ពីករណី​ឆ្លងក្នុងសហគមន៍សរុបចំនួន៦១ករណី ខណៈការផ្ទុះឡើងនៃវីរុសកូវីដ១៩ ប្រភេទថ្មី ដែលតា (Delta) បាននឹងកំពុងរីករាលដាលយ៉ាងឆាប់រហ័ស​ ទៅដល់ទីក្រុងមួយចំនួនទៀត។ដោយឡែក ទីក្រុងធំៗ រួមទាំងទីក្រុងប៉េកាំង ឥឡូវនេះក៏បានធ្វើតេស្តប្រជាជនរាប់លាននាក់ ​ព្រមទាំងបានបិទ​ខ្ទប់បរិវេណលំនៅដ្ឋាន ក៏ដូចជានាំយកអ្នកដែលមានការពាក់ព័ន្ធទៅធ្វើចត្តាឡីស័ក៕