អគ្គិភ័យឆេះរោងជួសជុលរថយន្តមួយកន្លែង ក្នុងសង្កាត់ទួលសង្កែទី២ ឆេះរថយន្តអស់ ០៣គ្រឿង
ភ្នំពេញ៖ នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះនៃអគ្គស្នងការដ្ឋាននគរបាលជាតិ បានឱ្យដឹងថា រោងជួសជុលរថយន្តមួយកន្លែង ត្រូវបានអគ្គិភ័យឆាបឆេះយ៉ាងសន្ធោសន្ធៅដែលមូលហេតុបណ្តាលមកពីឆ្លងចរន្តអគ្គីសនីចេញពីរថយន្តបង្កជាអគ្គិភ័យ។
ហេតុការណ៍នេះបានកើតឡើងនៅវេលាម៉ោង ១១:៣០ នាទីព្រឹក ថ្ងៃទី០៥ ខែកក្កដា ឆ្នាំ២០២២ ស្ថិតនៅផ្លូវ៥៩៨ភូមិទួលថ្ងាន់ សង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ ដោយបានឆេះកម្ទេចរថយន្តអស់ចំនួន០៣ គ្រឿង រួមមាន៖ រថយន្តម៉ាក CRV ពណ៌ទឹកប៊ិច, រថយន្តម៉ាក NX200T ពណ៌ប្រផេះ, រថយន្តម៉ាក Tundra ពណ៌ទឹកប្រាក់ និងពុំបណ្តាលឱ្យរាលដាល ដល់ផ្ទះអ្នកជិតខាងឡើយ។
ក្នុងនោះ កងកម្លាំងអន្តរាគមន៍បង្ការពន្លត់អគ្គិភ័យនិងសង្គ្រោះ បានប្រើប្រាស់រថយន្តការិយាល័យអគ្គិភ័យជាច្រើនគ្រឿង ទៅអន្តរាគមន៍បាញ់ពន្លត់ហើយភ្លើងបានរលត់ទៅវិញ នៅវេលាម៉ោង ១២:៣០ នាទីព្រឹក នាថ្ងៃខែឆ្នាំដដែល។យ៉ាងណាមិញ ក្នុងនោះហេតុនេះ មិនបណ្តាលឱ្យមានមនុស្សស្លាប់ ឬរងរបួសនោះឡើយ៕
