គួរឱ្យស្តាយ! បាក់រលំដើមឈើ នៅប្រាសាទបន្ទាយស្រី និងប្រាសាទបេងមាលា ដោយសារភ្លៀង លាយឡំខ្យល់កន្ត្រាក់
សៀមរាប៖ ភ្លៀងធ្លាក់មួយមេធំលាយឡំខ្យល់កន្ត្រាក់ បណ្តាលឲ្យបាក់រលំ ដើមឈើ ចំនួន ១២ដើម តាមតំបន់រមណីយដ្ឋាននានាក្នុងខេត្តសៀមរាប នៅយប់ថ្ងៃទី២៧ ខែឧសភា ឆ្នាំ២០២២។
ករណីគ្រោះធម្មជាតិនេះ គឺនៅប្រាសាទបន្ទាយស្រី ដោយដើមឈើ ០២ដើម បានដួលរលំនៅ នៅវេលាម៉ោង ១៨ និង៤០នាទី ក្នុងនោះដើមធ្លក ០១ដើម ស្ថិតនៅខាងលិចរោងអភិរក្សប្រាសាទបន្ទាយស្រី មុខកាត់ ៨០ សង់ទីម៉ែត្រប្រវែង ២០ម៉ែត្រ ដួលរលំទៅទិសអាគ្នេយ៍ បង្កឲ្យខូចខាតដល់ការដ្ឋានរបស់ក្រុមហ៊ុនអ៊ីអិនស៊ី អ៊ីនធើប្រាយ តែមិនបណ្តាលអោយប៉ះពាល់ដល់ហេដ្ឋារចនាសម្ព័ន្ធប្រាសាទឡើយ និងដើមពង្រ ០១ដើមទៀត ដួលនៅក្បែររោងសហគមន៍ផ្សារប៉ាវ៉ីស។
ដោយឡែក នៅរមណីយដ្ឋានភ្នំក្បាលស្ពាន ដើមឈើ ០៣ដើម ដែលមានដើមព្រីង,ដើម ពពាលខែ និងដើមឆ្នូតទ្រ បានដួលរំនៅវេលាម៉ោង ០៥ និង៣៥ នាទីល្ងាច តែមិនបណ្តាលអោយប៉ះពាល់ រឺខូចខាតដល់រូបចម្លាក់នោះទេ ។
ចំណែកនៅប្រាសាទបេងមាលា នាវេលាម៉ោងប្រហែល១៨ និង០៥នាទី មានករណីរលំ ដើមឈើ ចំនួន ០៧ដើម រួមមាន ដើមស្រឡៅ០១ដើមមានមុខកាត់ ៥oស.ម ប្រវែង២០ម, ដើមស្ដៅយោង ០១ដើមមានមុខកាត់ ៤០ស.ម ប្រវែង ២១ ម, ដើមម្កាក់ព្រៃ០១ដើមមានមុខកាត់ ៣០ស.ម ប្រវែង ២០ម, ដើមសង្កែ០៣ដើមមានមុខកាត់ ២០ស.ម. ប្រវែង ១៥ម, ដើមក្រសាំង០១ដើមមានមកកាត់ ២០ស.ម ប្រវែង ១៥ម.។ ក្នុងនោះមានដើមស្រឡៅ និងដើមស្ដៅយោង ដួលរលំនៅចំណុចឃឿន ទី០១ ច្រកផ្លូវចូលខាងជើងប្រាសាទបេងមាលា បណ្តាលឱ្យបែកថ្មក្រាល ប្រភេទថ្មភក់ ចំនួន ០១ដុំ មានទំហំកំពស់ ៣០សង់ទីម៉ែត្រ ប្រវែង ០១ម៉ែត្រ ។
យ៉ាងណាមិញ កម្លាំងសមត្ថកិច្ចជំនាញបានរាយការណ៍ជូនទៅអាជ្ញាធរជាតិអប្សរា ហើយក្រុមការងារបច្ចេកទេសរបស់នាយកដ្ឋានគ្រប់គ្រងព្រៃឈើទេសភាពវប្បធម៌ និងបរិស្ថាន នៃអាជ្ញាធរជាតិអប្សរា បានកំពុងកាត់ដកហូតដើមឈើទាំងនោះចេញហើយ៕
ប្រភព៖ អគ្គស្នងការដ្ឋាននគរបាលជាតិ