កូរ៉េខាងជើង រកឃើញអ្នកចេញរោគសញ្ញាគ្រុនក្តៅ ក្រោម១០ម៉ឺននាក់ ជាលើកដំបូង
បរទេស៖ប្រព័ន្ធផ្សព្វផ្សាយរដ្ឋ បាននិយាយនៅថ្ងៃសៅរ៍នេះថា ករណីគ្រុនក្តៅប្រចាំថ្ងៃក្នុងប្រទេសកូរ៉េខាងជើងបានធ្លាក់ចុះមកនៅក្រោម១០ម៉ឺននាក់ជាលើកដំបូង ដែលជាចំនួនតិច ធៀបទៅនឹងកាលពីជាង៣សប្តាហ៍កន្លងទៅ បន្ទាប់ពីប្រទេសនេះទទួលស្គាល់ជាលើកដំបូងពីការផ្ទុះឡើងនៃរលកឆ្លងកូវីដ១៩។ នេះបើតាមប្រភពព័ត៌មាន Ruters។
កូរ៉េខាងជើងបានប្រយុទ្ធប្រឆាំងនឹងរលកកូវីដ១៩យ៉ាងក្តៅគគុក ដែលមិនធ្លាប់មានពីមុនមកដោយបានប្រកាសស្ថានភាពអាសន្ន និងបិទខ្ទប់ទូទាំងប្រទេសក្នុងខែនេះដែលជាហេតុជំរុញឱ្យមានការព្រួយបារម្ភអំពីកង្វះវ៉ាក់សាំងការផ្គត់ផ្គង់ផ្នែកវេជ្ជសាស្រ្ត និងកង្វះខាតស្បៀងអាហារជាដើម។
ទីភ្នាក់ងារព័ត៌មានផ្លូវការ KCNA បាននិយាយថា មនុស្សចំនួន ៨៨,៥២០នាក់ទៀត មានរោគសញ្ញាគ្រុនក្តៅគិតត្រឹមល្ងាចថ្ងៃសុក្របើធៀបនឹងចំនួនជិត ៤០០,០០០នាក់កាលពីប្រមាណ ១០ថ្ងៃមុន។
សូមបញ្ជាក់ថា គិតមកទល់ពេលនេះ កូរ៉េខាងជើង មានអ្នកចេញរោគសញ្ញាគ្រុនក្តៅ កើនឡើងដល់៣.៣៦លាននាក់ ក្នុងចំណោមប្រជាជន ២៥លាននាក់ ខណៈអ្នកស្លាប់មានចំនួន ៦៩នាក់។ យ៉ាងណាមិញ ប្រទេសមួយនេះ មិនទាន់បញ្ជាក់ ថាតើមានមនុស្សប៉ុន្មាននាក់ឆ្លងជំងឺកូវីដ១៩ឬយ៉ាងណានោះទេ៕
