ផ្ទះប្រជាពលរដ្ឋ៣ខ្នង ត្រូវអគ្គិភ័យឆាបឆេះ ក្នុងសង្កាត់ស្វាយប៉ាក
ភ្នំពេញ៖ នៅវេលាម៉ោង១០និង៣០នាទីព្រឹក ថ្ងៃទី២១ ខែមិថុនា ឆ្នាំ២០២២ មានករណីអគ្គិភ័យឆាបឆេះផ្ទះបងប្អូនប្រជាពលរដ្ឋអស់ចំនួន៣ខ្នងផ្ទះជាប្រភេទសំណង់ឈើប្រក់ស័ង្កសី ស្ថិតនៅចំណុចផ្លូវបេតុង ភូមិស្វាយប៉ាក ក្រុម០៥សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ ដែលបណ្តាលមកពីការឆ្លងចរន្តអគ្គីសនី។នេះបើតាមការិយាល័យបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ។
យោងតាមរបាយការណ៍របស់លោកវរសេនីយ៍ឯកព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញ បានប្រាប់ឲ្យដឹងថា គ្រោះអគ្គិភ័យនេះបានឆាបឆេះផ្ទះប្រជាពលរដ្ឋប្រភេទសំណង់ ឈើប្រក់ស័ង្កសី ទំហំ (៨ម៉ែត្រ គុណ២៥ម៉ែត្រ), ផ្ទះទី២ទំហំ (១០ម៉ែត្រ គុណ ២០ម៉ែត្រ), ផ្ទះទី៣ ទំហំ (១០ម៉ែត្រ គុណ ១០ម៉ែត្រ) ឆេះផ្ទះអស់ចំនួន៣ខ្នង រួមទាំងសម្ភារៈអស់ទាំងស្រុង។
លោកវរសេនីយ៍ឯកបានបញ្ជាក់ថា ក្នុងប្រតិបត្តិការនេះ គឺកម្លាំងសមត្ថកិច្ចបានប្រើប្រាស់រថយន្តពន្លត់អគ្គិភ័យសរុប១៣គ្រឿង ប្រើប្រាស់ទឹកអស់ ១២ឡាន រួមមានរថយន្តការិយាល័យបង្កាពន្លត់អគ្គិភ័យនិងសង្គ្រោះ នៃស្នងការដ្ឋាននគរបាករាជធានីភ្នំពេញ ចំនួន ១១គ្រឿង ប្រើប្រាស់ទឹកអស់១១ឡាន ស្មើនឹង ៤៤ម៉ែត្រូគូប, រថយន្តក្រសួងមហាផ្ទៃចំនួន០១គ្រឿង មិនបានប្រើប្រាស់, រថយន្តសាលាខណ្ឌឫស្សីកែវចំនួន០១គ្រឿង ប្រើប្រាស់ទឹកអស់ ១ឡាន ស្មើនឹង៤ម៉ែត្រូគូប៕
