កូរ៉េខាងជើង ប្រកាសលែងមានករណីគ្រុនក្តៅថ្មីជាលើកដំបូង ចាប់តាំងពីការផ្ទុះឡើងនៃជំងឺកូវីដ១៩មក
បរទេស៖ ប្រព័ន្ធផ្សព្វផ្សាយរដ្ឋនៅថ្ងៃសៅរ៍នេះបានរាយការណ៍ថា ប្រទេសកូរ៉េខាងជើងលែងមានករណីគ្រុនក្តៅថ្មីជាលើកដំបូង ចាប់តាំងពីប្រទេសនេះបានរកឃើញវត្តមានជំងឺឆ្លងជំងឺកូវីដ១៩កាលពីពាក់កណ្តាលខែឧសភា។
កាលពីដើមខែនេះ កូរ៉េខាងជើងបានប្រកាសថាខ្លួនកំពុងស្ថិតនៅលើផ្លូវឆ្ពោះទៅបញ្ចប់វិបត្តិកូវីដ១៩របស់ខ្លួនបើទោះបីជាប្រទេសជិតខាង ជួបប្រទះនឹងការកើនឡើងវិញ នៃករណីឆ្លងជំងឺដែលរុញច្រានដោយសារវីរុសបំប្លែងថ្មីអូមីក្រុងក៏ដោយ។
ទីភ្នាក់ងារសារព័ត៌មាន KCNA បានឱ្យដឹងថា ៩៩.៩៩% នៃអ្នកចេញរោគសញ្ញាគ្រុនក្តៅចំនួន៤.៧៧លាននាក់ ចាប់តាំងពីចុងខែមេសា បានជាសះស្បើយទាំងស្រុងអស់ហើយ។ យ៉ាងណាមិញ ដោយសារតែកង្វះការធ្វើតេស្តជាក់ស្តែងគេមិនអាចដឹងពីតួលេខពិតប្រាកដ អំពីចំនួនមនុស្សដែលធ្វើតេស្តវិជ្ជមាន ជំងឺកូវីដ១៩នោះទេ។
គួររម្លឹកថា កូរ៉េខាងជើងបានបន្តប្រតិបត្តិការរថភ្លើងដឹកជញ្ជូនទំនិញ ជាមួយប្រទេសចិនជាបណ្ដោះអាសន្ននៅដើមឆ្នាំនេះប៉ុន្តែក្រោយមកបានផ្អាកដំណើរការម្ដងទៀតក្នុងខែមេសាដោយសារការភ័យខ្លាចនៃការរីករាលដាលនៃមេរោគកូវីដ១៩៕
