វីរុសបំប្លែងថ្មី Delta Plus បង្ហាញវត្តមានចំនួន ៤២ប្រទេសហើយ
បរទេស៖ អង្គការសុខភាពពិភពលោក (WHO) បាននិយាយថាខ្លួនកំពុងតាមឃ្លាំមើលវីរុសថ្មីមួយ ដែលបំប្លែងចេញពីប្រភេទ Delta ដើម្បីកំណត់ថាតើវាឆ្លងលឿនជាងវីរុសប្រភេទដើម ឬយ៉ាងណា ខណៈបច្ចុប្បន្នវាកំពុងលេចវត្តមាននៅក្នុងប្រទេសចំនួន ៤២ហើយ នៅទូទាំងពិភពលោក។
វីរុសកូវីដបំប្លែងថ្មី ដែល WHO កំពុងតាមឃ្លាំមើលនេះ ត្រូវបានគេហៅថា Delta Plus ឬ AY. 4.2 ។ ក្នុងពេលជាមួយគ្នានោះដែរ WHO ក៏កំពុងការស្រាវជ្រាវវាយតម្លៃចំពោះភាពស៊ាំរបស់មនុស្សទៅលើវីរុសកូវីដ១៩ប្រភេទថ្មីនេះ។
កន្លងមកក្រុមជំនាញសុខាភិបាលអង់គ្លេសបានបើកការស្រាវជ្រាវ ដោយមកទល់ពេលនេះមិនទាន់មានភស្តុតាងបង្ហាញថាវីរុសបំប្លែងថ្មីគ្រោះថ្នាក់ជាងវីរុសនាពេលបច្ចុប្បន្ន ឬក៏ធ្វើឱ្យចុះខ្យោយភាពស៊ាំនៃវ៉ាក់សាំងប្រឆាំងកូវីដ១៩នោះដែរ។
គួរឱ្យដឹងដែរថា មកទល់ពេលនេះ ជំងឺកូវីដ១៩បានឆ្លងរាលដាលដល់មនុស្ស២៤៦,៣៤១,២៩៨នាក់ទូទាំងពិភពលោក ហើយក្នុងនោះ សហរដ្ឋអាមេរិកនិងប្រទេសឥណ្ឌា មានករណីឆ្លងនាំមុខគេ៕
