រដ្ឋកាលីហ្វ័រញ៉ា បញ្ជាទិញថង់រុំសាកសព និងទូក្លាសេជាច្រើនគ្រឿងបន្ថែម ខណៈចំនួនអ្នកស្លាប់ដោយសារកូវីដ១៩ នៅតែបន្តកើនឡើងខ្លាំង

កាលីហ្វ័រញ៉ា៖ តាមការចុះផ្សាយរបស់សារព័ត៌មាន​NBCបានឱ្យដឹងថា អាជ្ញាធររដ្ឋកាលីហ្វ័រញ៉ា បានទិញថង់រុំសាកសពចំនួន ៥,០០០ថង់និងទូទឹកកកក្លាសេសាកសពជាង ៦០គ្រឿងបន្ថែម ដើម្បីទុកចែកចាយទៅកាន់មន្ទីរពេទ្យ និងទៅតាមតំបន់នានាខណៈចំនួនអ្នកស្លាប់ដោយសារជំងឺកូវីដ១៩នៅតែបន្តកើនឡើងខ្លាំង។

អភិបាលរដ្ឋកាលីហ្វ័រញ៉ា លោក Gavin Newsomបានគូសបញ្ជាក់ឱ្យដឹងថា ទោះបីជាវ៉ាក់សាំងកូវីដ១៩ បានចាប់ផ្តើមចែកចាយនៅទូទាំងអាមេរិកក៏ដោយក៏វិបត្ដិនេះនៅមិនទាន់ចប់ដែរ ដោយសារតែចំនួនអ្នកស្លាប់ពីមួយថ្ងៃទៅមួយថ្ងៃនៅមិនថមថយទាល់តែសោះ។

ក្នុងនោះលោកក៏បានបន្តថា ប្រជាជនត្រូវមានភាពសុទិដ្ឋិនិយមទៅលើបញ្ហាដែលខ្លួនកំពុងជួបប្រទះនិងត្រូវការពារខ្លួនដោយពាក់ម៉ាស បាញ់អាកុល រក្សា​គម្លាតចំងាយនិងអនុវត្តតាមវិធានការផ្សេងៗទៀត ដើម្បីរួមគ្នាកាត់បន្ថយការរីករាលដាលនៃមេរោគឆ្លងពីព្រោះថាស្ថានភាពបច្ចុប្បន្ននេះមិនអាចមើលស្រាលបានឡើយ។

គួរជម្រាបឱ្យដឹងថា នៅរដ្ឋកាលីហ្វ័រញ៉ា មានករណីឆ្លងកូវីដ១៩ ថ្មីនៅទូទាំងរដ្ឋប្រហែលជាង ៣២,៣០០ ករណីឯនោះក្នុងមួយថ្ងៃៗ ក្នុងនោះចំនួនករណីប្រជាជនដែលសម្រាកព្យាបាលនៅមន្ទីរពេទ្យបានកើនឡើងពីប្រមាណ ៨,៥០០ ករណី ទៅប្រហែល ១៤,២០០ កាលពីថ្ងៃច័ន្ទ។ ហើយមនុស្សច្រើនជាង២១,០០០ នាក់បានស្លាប់ ហើយតួលេខនេះនៅតែបន្តកើនឡើងជារៀងរាល់ថ្ងៃ។ នៅចុងខែធ្នូនេះ រដ្ឋកាលីហ្វ័រញ៉ាក៏រំពឹងថា នឹងអាចទទួលបានវ៉ាក់សាំងចំនួន២.១ លានដូស៕