ក្រសួងសាធារណការ​​ អនុញ្ញាតឱ្យក្រុមហ៊ុនចំនួន០៨​ ធ្វើអាជីវកម្មកែចង្កូតរថយន្តពីស្តាំមកឆ្វេងបាន

ភ្នំពេញ៖ ក្រសួងសាធារណការ​ និងដឹកជញ្ជូន បានចេញសេចក្តីជូនដំណឹង ដោយ​មិនអនុញ្ញាតឱ្យរថយន្តគ្រប់ប្រភេទ​កែចង្កូតពីស្តាំមកឆ្វេង​ នៅតាមយានដ្ឋានគ្មានច្បាប់អនុញ្ញាតឱ្យធ្វើអាជីវកម្ម​ចូលត្រួតពិនិត្យលក្ខណៈបច្ចេកទេស​ និងចុះបញ្ជីផ្តល់បណ្ណសម្គាល់​និងបំពាក់ផ្លាកលេខសម្គាល់យានជំនិះឡើយ​ ដោយសារសកម្មភាពកែចង្កូតពីស្តាំមកឆ្វេងនៅតាមយានដ្ឋានទាំងនោះ​ពុំមានលក្ខណៈបច្ចេកទេសត្រឹមត្រូវ​ ដែលអាចបណ្តាលឱ្យរថយន្ត​បើកបរពុំមានសុវត្ថិភាព​និងបង្កគ្រោះថ្នាក់ជាយថាហេតុនៅពេលធ្វើចរាចរណ៍លើផ្លូវថ្នល់។

ក្រសួងសាធារណការ​ និងដឹកជញ្ជូន​ ​ជម្រាបជូនបន្ថែមថា កន្លងមកក្រសួងបានទទួលស្គាល់​និងអនុញ្ញាតឱ្យក្រុមហ៊ុនចំនួន០៨​ ធ្វើអាជីវកម្មកែចង្កូតពីស្តាំមកឆ្វេងរួមមាន៖

១.ក្រុមហ៊ុន​ Fuji Form Co., Ltd ២.ក្រុមហ៊ុន​ Lien Thong Investment Group Co.Ltd ៣.ក្រុមហ៊ុន​ S.T.P International (Cambodia )Public Co., Ltd ៤.ក្រុមហ៊ុន​ Seconimex Co., Ltd ៥.ក្រុមហ៊ុន​ សុវណ្ណយន្ត( SOVANN YAUN Co., Ltd) ៦.ប៉ាស្ទ័រ​មានជ័យ ៧.ក្រុមហ៊ុន​ ភី.អ.វ៉ាយ​ គ្លូបល​ ឯ.ក ៨.ក្រុមហ៊ុន​ ប៉ាវ​ គីមស្រ៊ាង។

សូមរម្លឹកថា សម្តេចតេជោហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍ក្នុងកិច្ច ប្រជុំពេញអង្គគណៈរដ្ឋមន្ត្រីកាលពីព្រឹកថ្ងៃទី៨ ខែតុលា ឆ្នាំ២០២១ ថា រាជរដ្ឋាភិបាលកម្ពុជា បានប្តេជ្ញានឹងមិនឲ្យមានរថយន្តចង្កូតស្តាំប្រើប្រាស់នៅលើដងផ្លូវទៀតឡើយ៕