តើពិភពលោកនឹងទៅជាយ៉ាងណា ក្រោយWHO ចេញការព្រមានថ្មីអំពីគ្រោះថ្នាក់អូមីក្រុង យ៉ាងដូច្នេះ...
ពិភពលោក៖ កាលពីថ្ងៃទី ១២ ខែមករា ឆ្នាំ២០២២ កន្លងទៅ អង្គការសុខភាពពិភពលោក (WHO) បាននិយាយថាមេរោគអូមីក្រុង មានគ្រោះថ្នាក់ខ្លាំងណាស់ ជាពិសេសសម្រាប់អ្នកដែលមិនទាន់បានចាក់វ៉ាក់សាំងប្រឆាំងនឹងកូវីដ១៩។
យ៉ាងណាមិញ លោកអគ្គនាយកWHO លោក Tedros Adhanom Ghebreyesus បានលើកឡើងថា "ទោះបីជាវ៉ារ្យ៉ង់ អូមីក្រុង បណ្តាលឱ្យមានជម្ងឺមិនសូវធ្ងន់ធ្ងរជាង Delta ក៏ដោយ ក៏វានៅតែជាមេរោគដ៏គ្រោះថ្នាក់ ជាពិសេសសម្រាប់អ្នកដែលមិនបានចាក់វ៉ាក់សាំង" ។ WHO បានលើកឡើងបន្តថា ការកើនឡើងនាពេលបច្ចុប្បន្ននៃចំនួនករណីឆ្លងកូវីដ១៩ នៅជុំវិញពិភពលោកគឺបណ្តាលមកពីអូមីក្រុង ហើយលោកបានសង្កត់ធ្ងន់ថាមនុស្សមិនគួរបោះបង់ចោលការផ្លាស់ប្តូរ និងការប្រយុទ្ធប្រឆាំងនិងអូមីក្រុងដ៏គួរឱ្យព្រួយបារម្ភនោះទេ។
លោក Tedros បានបន្តប្រាប់អ្នកសារព័ត៌មានយ៉ាងដូច្នេះថា "យើងមិនគួរអនុញ្ញាតឱ្យមានចុះចាញ់នឹងមេរោគនេះទេ ជាពិសេសនៅពេលដែលមនុស្សជាច្រើននៅជុំវិញយើងនៅតែមិនបានចាក់វ៉ាក់សាំង" ។ លោកបានសង្កត់ធ្ងន់ថា "មនុស្សភាគច្រើន" ដែលសម្រាកព្យាបាលនៅមន្ទីរពេទ្យជុំវិញពិភពលោក មិនទាន់ទទួលបានចាក់វ៉ាក់សាំងទេ ហើយនៅក្នុងទ្វីបអាហ្រ្វិក មនុស្សជាង៨៥ភាគរយនៅតែមិនទាន់បានទទួលវ៉ាក់សាំង។ យើងមិនអាចបញ្ចប់ដំណាក់កាលដ៏ស្រួចស្រាវនៃជំងឺរាតត្បាតបានទេលុះត្រាតែយើងបញ្ចប់វិសមភាពក្នុងសង្គមជាមុនសិន។
គួរបញ្ជាក់ផងដែរថា គិតត្រឹមថ្ងៃព្រហស្បតិ៍ ទី១៣ ខែមករា ឆ្នាំ២០២២ នេះ ចំនួនអ្នកឆ្លងកូវីដ១៩សរុបនៅទូទាំងពិភពលោក បានកើនដល់ទៅ ៣១៧,២៨៩,៩៣៨នាក់ ដែលជាចំនួនដ៏ច្រើនលើសលប់ ខណ:អ្នកដែលទទួលមរណភាពដោយសារតែជំងឺមួយនេះ មានរហូតដល់ទៅជាង៥លាននាក់៕
