សង្សារមិនប្រច័ណ្ឌ មិនមែនមានន័យថា គេមិនស្រលាញ់ទេ តែមកពី...
យល់ដឹង៖ មនុស្សពីរនាក់ស្រលាញ់គ្នា បើមិនចេះប្រច័ណ្ឌ មិនឈ្លោះប្រកែកគ្នាសោះ មិចហៅថាស្រលាញ់ដូចពាក្យស្លោកមួយតែងលើកឡើងថា«ចានក្នុងរាវ វាតែងអីប៉ះទង្គិចគ្នា»នេះជាមតិលើកឡើងរបស់មនុស្សមួយចំនួនធំ។
ជាក់ស្តែង ការលើកឡើងនេះ ពិតជាត្រឹមត្រូវព្រោះបើគិតទៅ ការប្រច័ណ្ឌគឺកើតមកពី ចិត្តស្រលាញ់ខ្លាំង តែអ្នកក៏ត្រូវតែដឹងផងដែរថាការដែលប្រច័ណ្ឌខុសទំនងច្រើនពេក មិនមែនមានន័យថា អ្នកកំពុងតែព្យាយាម ការពារចំណងស្នេហ៍នោះទេតែអ្នកបាននឹងកំពុងតែបំផ្លាញ ចំណងសេ្នហ៍មួយនោះចោលទៅ ដោយមិនដឹងខ្លួនទៅវិញទេ។ព្រោះនៅពេលដែល អ្នកយកចិត្តប្រច័ណ្ឌមកដាក់ពីមុខនោះ អ្នកនឹងលែងមើលឃើញអ្វីត្រូវអ្វីខុសទាំងអស់ គឺមានតែរឿងឈ្លោះប្រកែក ដាក់បន្ទុកឲ្យគ្នាតែប៉ុណ្ណោះ។
ក្នុងពេលនោះ ហើយដែលស្នេហាមួយដែលធ្លាប់តែល្អូកល្អើន ក៏នឹងចាប់ផ្តើមប្រែប្រួលរសជាតិ ពីផ្អែមល្ហែមមកជាសោះកកោះប្រែពីសោះអាក្រោះមកជា លែងមានអ្វីនិយាយរកគ្នាដូចមុន ហើយចុងក្រោយ ក៏ប្រែមកជាអ្នកដទៃ។ដូច្នេះត្រូវដឹងថា របៀបនៃការបង្ហាញក្តីស្រលាញ់ ទៅកាន់ដៃគូមានច្រើនរបៀបហើយពេលខ្លះមិនមែនទាល់តែសង្សារចេះប្រច័ណ្ឌ ហួងហែងច្រើន ទើបថាគេស្រលាញ់យើងនោះទេ៕
ហើយពេលខ្លះសង្សារមិនប្រច័ណ្ឌក៏ព្រោះតែហេតុផលមួយចំនួនដូចជា៖
១. ព្រោះស្រលាញ់
នៅពេលដែល អ្នកស្រលាញ់នរណាម្នាក់ខ្លាំងទោះបីសកម្មភាព ដែលគេសម្តែងចេញមក ធ្វើឲ្យអ្នកមិនសូវពេញចិត្ត ក៏ពិតមែនតែប្រសិនបើអាចធ្វើគេរីករាយ មានស្នាមញញឹម នោះអ្នកក៏មានអារម្មណ៍ថា មានសុភមង្គលដូចគ្នាដែរ។
២. ខ្លាចបាត់បង់
មនុស្សស្រីឬ មនុស្សប្រុសខ្លះមិនបង្ហាញការប្រច័ណ្ឌ ឲ្យសង្សារបានឃើញ មិនមែនមានន័យថា គេមិនស្រលាញ់អ្នកនោះទេគ្រាន់តែគេមិនចង់បង្ក ឲ្យមានជារឿងល្អក់កកររវាងគ្នានឹងគ្នា ធ្វើឲ្យចំណងស្នេហ៍កាន់តែឃ្លាតឆ្ងាយពីគ្នា រហូតដល់បាត់បង់នោះទេ។
៣. ទុកចិត្ត
សង្សារដែលមិនចេះប្រច័ណ្ឌ មិនមែនមានន័យថាគេមិនស្រលាញ់អ្នកនោះទេ គ្រាន់តែគេជឿទុកចិត្តនិង ផ្តល់សេចក្តីទុកចិត្ត ទៅលើអ្នកទាំងស្រុងគេជឿជាក់ថា អ្នកមិនអាចក្បត់គេ ដូចដែលគេមិនអាចក្បត់អ្នកដែរ។ ព្រោះគេយល់ថាក្តីស្រលាញ់ដែលគេបានផ្តល់ឲ្យអ្នក គឺគ្រប់គ្រាន់នឹងឲ្យអ្នក មិនអាចដើរចេញពីគេបានហើយ។
៤. ផ្តល់សេរីភាព
ពេលខ្លះដៃគូររបស់អ្នក មិនចង់ធ្វើឲ្យអ្នកមានអារម្មណ៍ថា មានសម្ពាធដូចជាសិទ្ធិសេរីភាព ក្នុងការស្លៀកពាក់ ការរាប់អានមិត្តភក្តិ ជាដើម។ គេមិនប្រកាន់ហួងហែងហួសហេតុ រហូតធ្វើឲ្យអ្នកមានអារម្មណ៍យល់ថា អ្នកកំពុងតែត្រូវបានគេគ្រប់គ្រងគ្រប់រឿងនោះទេ។ ព្រោះការស្រលាញ់គឺជា ការចេះយល់ពីគ្នា គោរពគ្នាមិនមែនជាការគាបសង្កត់ ឬដាក់សម្ពាធឲ្យគ្នានោះទេ។
៥. គោរពសិទ្ធិឯកជនដៃគូ
ថ្វីត្បិតតែមានងារថាជា សង្សារក៏ពិតមែន តែក៏មិនមែនមានន័យថាអ្នកមានសិទ្ធិក្នុងការគ្រប់គ្រង លើជីវិតឯកជន របស់ដៃគូម្ខាងទៀតទេ។ជាក់ស្តែង ដូចជាសិទ្ធិក្នុងការរាប់អាន មិត្តភក្តិប្រុសស្រី ការជួបជុំរួមទាំងទូរស័ព្ទ។ត្រូវចាំថាមនុស្សប្រសិនបើគេចង់ក្បត់ទោះបីខំប្រឹងតាមដានប្រច័ណ្ឌ យ៉ាងណាក៏គេនៅតែក្បត់យើងបានដែរ។
តែយ៉ាងណាមិញ ហេតុផលទាំងអស់ខាងលើនេះ មិនមែនសុទ្ធតែត្រឹមត្រូវតាមកាលៈទេសៈ របស់គូស្នេហ៍ទាំងអស់ដែរ។ ព្រោះពេលខ្លះសង្សារ ដែលមិនប្រច័ណ្ឌមិនមែនមកពីគេខ្លាចបាត់បង់យើងនោះទេ តែមកពីគេលែងខ្វាយខ្វល់ពីយើងលែងមានអារម្មណ៍ស្រលាញ់ ដូចមុនក៏ថាបានដែរ៕