តារាសម្តែងជប៉ុនម្នាក់ ចងកសម្លាប់ខ្លួនឯង តាមការសន្និដ្ឋានដំបូងព្រោះតែបញ្ហា...
ជប៉ុន៖ ជាដំណឹងដ៏គួរឲ្យរន្ធត់មួយ នាថ្ងៃទី១៤ ខែវិច្ឆិកា នេះសារព័ត៌មានNHK បានធ្វើសេចក្តីរាយការណ៍ថាតារាសម្តែងប្រុសAkira Kuboderaត្រូវបានគេរកឃើញថា បានសម្លាប់ខ្លួន នៅក្នុងផ្ទះរបស់លោក នៅក្នុងតំបន់Nakano នៃប្រទេសជប៉ុន កាលពីថ្ងៃទី១៣ ខែវិច្ឆិកា កន្លងទៅថ្មីៗនេះ។
បន្ទាប់ពីត្រូវបាន គេប្រទះឃើញ តារាប្រុសរូបនេះ ក៏ត្រូវបានបញ្ជូន ទៅកាន់មន្ទីរពេទ្យសង្គ្រោះបន្ទាន់ ភ្លាមៗផងដែរ។ ក៏ប៉ុន្តែ ជាអកុសល តារាប្រុសរូបនេះបានបាត់បង់ជីវិត បាត់ទៅហើយ។ បើយោងតាម ប្រព័ន្ធផ្សព្វផ្សាយរបស់ ប្រទេសជប៉ុនបានឲ្យដឹងថា តារាប្រុសរូបនេះ ស្លាប់ដោយសារតែ ការចងកខ្លួនឯង ហើយនៅពេលដែល គេប្រទះឃើញ លោកក៏បានផុតដង្ហើម បាត់ទៅហើយដែរ។
ជុំវីញករណីនេះ អាជ្ញាធរក្នុងតំបន់ ក៏បានធ្វើការបញ្ជាក់ពីការស្លាប់របស់ តារាប្រុសរូបនេះ នៅក្នុងវ័យ៤៣ ឆ្នាំរួចហើយដែរ។ ក៏ប៉ុន្តែទាក់ទងនឹងការរាយការណ៍ច្បាស់លាស់ ពាក់ព័ន្ធនឹង ការស៊ើបអង្កេតផ្សេងៗ ជុំវិញការសម្លាប់ខ្លួននេះនៅមិនទាន់មាន ការបកស្រាយនៅឡើយនោះទេ។
ដោយឡែក បើតាមការសន្និដ្ឋានដំបូង បញ្ហាដែលធ្វើឲ្យតារាប្រុសរូបនេះឈានដល់ការសម្លាប់ខ្លួននោះគឺ ដោយសារតែ ចាប់តាំងពីដើមឆ្នាំ២០២០ រហូតមកទល់បច្ចុប្បន្នAkira បានជួបនៅវិបត្តិសេដ្ឋកិច្ចធ្ងន់ធ្ងរ ដោយសារតែគ្មានការងារសិល្បៈធ្វើព្រោះតែវិបត្តិនៃជម្ងឺឆ្លង រួមទាំងការផុតកំណត់ជាមួយក្រុមហ៊ុនចាស់ របស់លោកផងដែរ។ ក៏ប៉ុន្តែនេះគ្រាន់តែជា ការសន្និដ្ឋានក្នុងជំហានដំបូង តែប៉ុណ្ណោះ ទាក់ទងនឹងបញ្ហាច្បាស់លាស់ដែលធ្វើឲ្យ តារាប្រុសវ័យ៤៣ឆ្នាំរូបនេះ ឈានដល់ការសម្លាប់ខ្លួន យើងក៏នៅតែមិនទាន់បានដឹងច្បាស់ នៅឡើយនោះដែរមានតែរងចាំតាមដាន ការស៊ើបអង្កេត បន្តទៀតពី សមត្ថកិច្ចទាំងអស់គ្នា៕
