ឃើញគេញុំាទំនងពេក រៀនធ្វើម្ហូបទាំងនេះ ញុំាខ្លួនឯងឲ្យឆ្ងាញ់មាត់ម្ដងមើល

កម្សាន្ត៖ ភាគច្រើនគេពេញនិយមចូលចិត្តមើលកម្មវិធីញុំាម្ហូបដែលគេស្គាល់ថាអេអេសអិមអរ មុកបាង​ ASMR Mukbang ដែលអ្នកប្រើប្រាស់ប្រព័ន្ធអ៊ីនធើណែត ទស្សនាតាមរយៈកម្មវិធីក្នុងទូរស័ព្ទដៃឈ្មោះថាយូធូប YouTube។ កម្មវិធីមួយនេះពិតជាល្បីល្បាញខ្លាំងមែនទែនមានអ្នកទស្សនារហូតទៅដល់រាប់លាននាក់ដែលវាជាកម្មវិធីកម្សាន្តអារម្មណ៍តាមរយៈការញុំាម្ហូបគួរឲ្យឆ្ងាញ់ច្រើនមុខ ដែលគេហៅថាមុកបាង Mukbang ។

ម្ហូបទាំងនេះមានដូចជាភ្លៅមាន់បំពងមីរសជាតិឈីស ស៊ុបគីមឈី ប្រហិតឈឹងបែបកូរ៉េជាដើមដែលគេយកមកញុំាជាមួយគ្នាក្នុងពេលតែមួយ ហើយម្ហូបទាំងនេះដែរពួកគេធ្វើខ្លួនឯងទៅតាមចំណូលចិត្តរៀងៗខ្លួន។ ដោយឃើញថា ម្ហូបទាំងនេះទាក់ទាញចំណាប់អារម្មណ៍អ្នកទស្សនាយ៉ាងច្រើនជាមួយនឹងមុខម្ហូបដ៏គួរឲ្យឆ្ងាញ់ហើយវាមិនមានលក់នៅលើទីផ្សារនោះ សាកធ្វើម្ហូប មុកបាង Mukbang ដើម្បីភ្លក់រសជាតិតាមវិធីខាងក្រោម៖

ម្ហូបទី១ ស៊ុបគីមឈី៖

គ្រឿងផ្សំ៖

១. គីមឈី

២. សាច់ត្រីធូណាកំប៉ុង

៣. ស្ករស

របៀបធ្វើ៖

·       ហាន់គីមឈីចេញជាដុំខ្លីល្មមដាក់ក្នុងកូនឆ្នាំងមួយហើយដាក់ទឹកមួយកូនកែវ ដាក់ស្ករតាមដែលចង់បាន គាស់ត្រីធូណាកំប៉ុងចាក់ចូល។បន្ទាប់មកបើកភ្លើងទុកវារហូតដល់ពុះហើយឡើងចេញ។

ម្ហូបទី២ ប្រហិតសាច់ក្រកឈឹង

គ្រឿងផ្សំ៖

១. ប្រហិតសាច់ក្រកឬប្រហិតអីក៏បានតាមដែលចង់ញុំា

២. ផ្កាខាត់ណាបៃតង ការ៉ុត

៣. ខ្ទឹមស ខ្ទឹមបារាំង

៤. ទឹកម្ទេសទឹកប៉េងប៉ោះ ទឹកគីមបួយ ប្រេងខ្យង ទឹកជ្រលក់កូរ៉េ

របៀបធ្វើ៖

·       ហានបន្លែខាត់ណាបៃតងការ៉ុត និងប្រហិតដាក់ចានត្រៀមមួយឡែក។

·       លាយទឹកជ្រលក់ដោយដាក់ចានក្រឡុកមួយដាក់ទឹកម្ទេស ទឹកប៉េងប៉ោះ ទឹកគីមបួយ ប្រេងខ្យង ទឹកជ្រលក់កូរ៉េចូលហើយលាយវាចូលគ្នា។

·       ដាក់ខ្ទះបំពងខ្ទឹមសឲ្យឈ្ងុយហើយដាក់ខ្ទឹមបារាំង ការ៉ុតនិងប្រហិតចូលលីងត្រឡប់ចុះត្រឡប់ឡើងឲ្យប្រហិតរៀនឆ្អិនបន្តិចដាក់ទឹកជ្រលក់និងផ្កាខាត់ណាចូល ឆាចូលគ្នាឲ្យសព្វទុកដល់ឆ្អិនដួសដាក់ចាន។

ម្ហូបទី៣ ប្រហិតត្រីលីង

គ្រឿងផ្សំ៖

១. ប្រហិតត្រី

២.​ ផ្កាខាត់ណាបៃតង ការ៉ុត ខ្ទឹមខ្យល់ ម្ទេសប្លោក

៣.​ ម្ទេសក្រៀមម៉ត់ ខ្ទឹមសម៉ត់ ស្ករស ទឹកស៊ីអីវ ទឹកជ្រលក់កូរ៉េ

៤. ប្រេងល្ង ល្ង

របៀបធ្វើ៖

·       យកប្រហិតត្រីហាន់ជាដុំល្មមហាន់បន្លែការ៉ុត ខ្ទឹមខ្យល់ ខ្ទឹមបារាំង ផ្កាខាត់ណា។

·       លាយគ្រឿងដោយដាក់ទឹកស៊ីអីវ ម្ទេសក្រៀមម៉ត់ ខ្ទឹមសម៉ត់ ទឹកជ្រលក់កូរ៉េ ស្ករសកូរចូលគ្នា ថែមទឹកបន្តិចហើយកូរវាឲ្យសព្វ។

·       ដាក់បន្លែទាំងអស់និងប្រហិតត្រីលីងក្នុងខ្ទះដោយបើកភ្លើងតិចៗលីងចុះឡើងហើយដាក់គ្រឿងដែលលាយនោះចូល លីងវារហូតដល់ចូលជាតិឆ្អិនហើយ ដាក់ប្រេងល្ងចូលបន្តិចនិងរោយល្ងពីលើរួចរាល់។

ម្ហូបទី ៤ មីរសជាតិឈីស

ចំពោះមីឈីសមួយមុខនេះ យើងអាចស្រុះមីហើយដាក់ញុំាក្នុងស៊ុបគីមឈីឬប្រហិតលីង ហើយបន្ថែមឈីសពីលើជាការស្រេច។

ម្ហូបទី៥ គីមបាប់ 

គ្រឿងផ្សំ(អាចជ្រើសរើសតាមចំណង់ចំណូលចិត្ត)៖

·      បាយក្នុងបរិមាណល្មម

·      ដើមស្ពីណាត (spinach)

·      ល្ង

·      Sesame leaves

·      សាច់ធូណាកំប៉ុង

·      Cheddar cheese

·      ពងមាន់

·      សារាយរុំបាយ

·      សាច់ក្ដាម

·      ប្រហិតត្រី

·      Ham

·      Burdock

·      ជ្រក់ឆៃថាវ

·      ត្រសក់

·      ការ៉ុត

របៀបធ្វើ៖

១. យើងត្រូវត្រៀមគ្រឿងផ្សំទុកមុនដូចជា លាយគ្រឿងសម្រាប់ចៀនពងមាន់ទុកមួយឡែក។ ដាំទឹកស្រុះ Spinach ដាក់អំបិលបន្តិច ទុកវាប្រហែល ៣០វិនាទី ហើយស្រង់ចេញ រួចដាក់អំបិលល្ងនិងប្រេងអូលីវ រោយពីលើ ហើយច្របល់ឲ្យសព្វ រួចទុកមួយឡែក ។

២. ហាន់ត្រសក់ជាបណ្ដោយ យកគ្រាប់ចេញ រួចហាន់វាជាចំណិតៗស្ដើងៗ ដាក់ចូលក្នុងចាន រួចដាក់ទឹកនិងអំបិលបន្តិចទុក ១៥ នាទី ដើម្បីឲ្យវាចូលជាតិ ។

៣. ហែកសាច់ក្តាមជាបណ្ដោយស្ដើងៗ ហាន់ប្រហិតត្រីបណ្ដោយស្ដើងៗ កាត់Hamជាចំណិតៗ ហាន់ការ៉ុត burdock និង ជ្រក់ឆៃថាវ ជាសរសៃរឆ្មាៗ ដាក់ទឹក ម៉ាយូនេស លាយជាមួយសាច់Tuna តាមចំនួនដែលចង់បាន (ដាក់ចានផ្សេងៗគ្នាទាំងអស់) ។

៤. រួចយកគ្រឿងមួយចំនួន ទៅចម្អិន ដូចជា មុនដំបូង ចៀនពងមាន់ជាបន្ទះស្តើងហើយកាត់វាជាសរសៃរឆ្មាៗ។ ចៀន Ham ជាមួយនិងប្រេងអូលីវចៀនប្រហិតដាក់ទឹកស៊ីអីវ១ស្លាបព្រាកាហ្វេ ចៀនការ៉ុតដាក់អំបិលបន្តិចឲ្យវាស្វិតជាការស្រេច។​

៥. នៅពេលត្រៀមគ្រឿងផ្សំរួចរាល់ហើយ ​យើងចាប់ផ្តើមដួសបាយដាក់អំបិលលាយបន្តិច យកសារ៉ាយវេចបាយមួយបន្ទះដាក់លើជ្រុញដួសបាយល្មមឲ្យស្ដើងតាមដែលអាចធ្វើទៅបាន បន្ទាប់មកយក sesameleaves  Cheddar Cheese គ្រឿងផ្សំដែលចម្អិនរួចមកតម្រៀបលើបាយ ហើយរុំវាឲ្យណែន លាបប្រេងល្ង និងរោយល្ងពីលើ ។