លោកគ្រូ Ole ប្រាប់ Man UTD ឲ្យទិញកីឡាករម្នាក់នេះកាត់មុខក្រុមគូប្រជែង Liverpool ឲ្យបាន

អង់គ្លេស ៖ យោងតាមការរាយការណ៍ លោកគ្រូបង្វឹកសញ្ជាតិន័រវេស Ole Gunnar Solskjaer ចង់ឲ្យក្លិបបិសាចក្រហម Manchester United តាមទិញយកកីឡាករម្នាក់ឈ្មោះ Dayot Upamecano ឲ្យបានដើម្បីកុំឲ្យក្លិបហង្សក្រហម Liverpool កាត់មុខ។

ភាគីរបស់លោកគ្រូបង្វឹក Jurgen Klopp បានសម្លឹងឃើញសមត្ថភាពរបស់ខ្សែការពារសញ្ជាតិបារាំងដែលកំពុងលេងឲ្យក្លិបនៅអាល្លឺម៉ង់ RB Leipzig រូបនេះដើម្បីយកមកពង្រឹងតំបន់ការពារក្នុងក្រុមក្រោយខ្សែការពារឆ្នើមៗដូចជាVirgil van Dijk និងJoe Gomez សុទ្ធតែរងរបួសធ្ងន់និងត្រូវសម្រាកក្រៅទីលានរយៈពេលវែង។ ប៉ុន្តែយ៉ាងណាមិញ កាលពីពេលថ្មីៗទៅនេះលោកគ្រូ Klopp បានចេញមុខនិយាយដោយផ្ទាល់ថា Liverpool មិនទាន់អាចទិញកីឡាករណាម្នាក់នៅទីផ្សារដោះដូរកីឡាករខែមករាបាននោះឡើយ ដែលនោះជាឪកាសមាសសម្រាប់លោកគ្រូបង្វឹក  Solskjaer ក្នុងការស្រវាយក ខ្សែការពារវ័យ២២ឆ្នាំនេះ។

កាលពីរដូវក្ដៅឆ្នាំមុន Manchester United ប៊ិះនឹងទិញ Upamecano បានទៅហើយតែក៏ត្រូវដកថយមកវិញដោយសារក្លិបទិញបានប្រធានក្រុម Harry Maguire ពីក្លិបកញ្ជ្រោង Leicester City ។

Upamecano ត្រូវបានគេចាត់ទុកថាជាកីឡាករខ្សែការពារវ័យក្មេងដ៏មានសមត្ថភាពម្នាក់ក្នុងវិស័យបាល់ទាត់នៅអឺរ៉ុបដោយមានឈ្មោះចូលលេងក្នុងជម្រើស១១នាក់ដំបូងឲ្យ RB Leipzig អស់រយៈកាល៥ឆ្នាំជាងមកហើយនិងថែមទាំងជាប់ឈ្មោះក្នុងក្រុមជម្រើសជាតិបារាំងទៀតផង។

គេដៅទុកថាតម្លៃខ្លួនរបស់ Dayot Upamecano មានប្រហែលខ្ទង់ ៣៨លានផោន(ស្មើនឹងប្រមាណ៥១.៩លានដុល្លារ)ប៉ុន្តែ Man UTD អាចនឹងធ្វើការចរចាតថ្លៃតិចជាងនេះនៅក្នុងខែនេះ បើយោងតាមការរាយការណ៍ពី The Sun។

នៅរដូវកាលនេះ Upamecano បង្ហាញខ្លួនឲ្យ RB Leipzig បាន១៤ដងនិងស៊ុតបញ្ចូលទីបាន១គ្រាប់និងបញ្ជូនបាល់ថែម១គ្រាប់ទៀត៕

ប្រភព៖​ metro