សុខៗ Baifern ចូលពេទ្យក្នុងពេលកំពុងសម្ដែង ព្រោះតែ.....

November 23, 2020

ថៃ៖ តារាសម្តែងតួឯកស្រី BaifernPimchanok ដែលជាតារាជួរមុខរបស់ថៃ កំពុងតែទទួលភាពល្បីល្បាញ និងការគំាទ្រពីសំណាក់ប្រិយមិត្តយ៉ាងកុះករព្រោះនាងមានសមត្ថភាពយ៉ាងខ្លាំងក្លាក្នុងការសម្ដែង និងគួបផ្សំជាមួយស្រស់ស្អាតរបស់នាង។

កាលពីប៉ុន្មានម៉ោងមុនសារព័ត៌មានមួយ បានចុះផ្សាយថា Baifern Pimchanok សម្រាកមិនគ្រប់គ្រាន់ដោយសារតែនាងមានព្រឹត្តិការណ៍ញឹកញាប់ជាបន្តបន្ទាប់ ធ្វើ៎ឲ្យនាងធ្លាក់ខ្លួនឈឺហើយទីបំផុតបានចូលពេទ្យជាលើកទី ២។

ក្នុងនោះ Baifern Pimchanok បាននិយាយថា ៖

ដោយសារតែខ្ញុំសម្រាកមិនបានគ្រប់គ្រាន់ ធ្វើឲ្យខ្ញុំធ្លាក់ខ្លួនឈឺអស់ ៧ថ្ងៃជាប់គ្នាហើយ ទោះជាយ៉ាងណាក្តី ខ្ញុំក៏នៅបន្តការងាររបស់ខ្ញុំជារឿយៗ ដោយមិនបានឈប់សម្រាកឡើយ ហើយខ្ញុំត្រូវញ៉ាំថ្នាំរាល់ ៦-៨ ម៉ោង ប៉ុន្តែវានៅតែមិនជាសះស្បើយឡើយ។ ក្រៅពីនេះ ខ្ញុំមានជំងឺគ្រុនទៀតផងបូកផ្សំជាមួយជំងឺរលាកច្រមុះថែមទៀត ដោយសារតែមិនព្រមសម្រាកឲ្យបានគ្រប់គ្រាន់។ខ្ញុំត្រូវថតរឿងជាបន្តបន្ទាប់ ខ្ញុំព្យាយាមអត់ធ្មត់ខ្លាំងណាស់ ក៏ប៉ុន្តែរាងកាយវាទៅលែងរួចគឺខ្សោយខ្លាំងណាស់ ខ្ញុំហូបចុកបានធម្មតា តែទីបំផុតខ្ញុំក៏នៅតែធ្លាក់ខ្លួនឈឺដដែល។
លោកគ្រូពេទ្យឲ្យខ្ញុំសម្រាកនៅមន្ទីរពេទ្យមួយអាទិត្យ ប៉ុន្តែខ្ញុំសូមមកសម្រាកនៅផ្ទះវិញ បន្ទាប់ពីសម្រាកបាន ១ ថ្ងៃ ខ្ញុំក៏បន្តទៅថតរឿងទៀត។ ក្នុងអំឡុងខែនេះ មានព្រឹត្តិការណ៍ច្រើនខ្លំាងមែនទែនដែលខ្ញុំត្រូវបំពេញ ហើយខ្ញុំគិតថាវានឹងកន្លងផុតទៅបានយ៉ាងជោគជ័យ។
ពីមួយថ្ងៃទៅមួយថ្ងៃ ខ្ញុំធ្វើការទាំងយប់ ទាំងថ្ងៃ ចប់ពីការងារមួយគឺចូលការងារមួយទៀត ហើយខ្ញុំត្រូវប្រញាប់បំពេញវាឲ្យបានលឿនបំផុតដែរ វាហាក់បីដូចជាខ្ញុំគ្មានពេល សម្រាកអ្វីសោះ ប៉ុន្តែខ្ញុំយល់ ព្រោះវាជារឿងចាំបាច់។ ថ្មីៗនេះ ទម្ងន់របស់ខ្ញុំរៀងស្រកបន្តិចព្រោះខ្ញុំនៅចង្អោរខ្លះៗ ប៉ុន្តែថ្ងៃនេះ ខ្ញុំមានអារម្មណ៍ថាអូខេខ្លាំងណាស់។
ខ្ញុំសូមអរគុណដល់ការព្រួយបារម្ភពីប្រិយមិត្តទាំងអស់ហើយក៏សុំទោសផងដែលធ្វើឲ្យព្រួយបារម្ភ ចាប់ពីពេលនេះតទៅ វានឹងល្អប្រសើរជាងមុន។

គួរឲ្យកត់សម្គាល់ផងដែរ Baifern Pimchanok ក៏នៅបន្តការងាររបស់នាងជារឿយៗ ហើយថ្មីៗនេះ នាងទើបតែបញ្ចប់រឿងជាមួយ Nadechដែលនឹងត្រៀមផ្សព្វផ្សាយឆាប់ៗ៕

ទាក់ទងជាមួយ:

តារាថៃ

អានបន្ថែម