នារីម្នាក់បាត់ខ្លួនជាង១១ឆ្នាំ ទីបំផុតរកឃើញវិញ ដែលរស់នៅឆ្ងាយពីផ្ទះប្រហែល៥០០ម៉ែត្រប៉ុណ្ណោះ

ឥណ្ឌា៖ នារីម្នាក់ មានឈ្មោះថា Sajitha បានបាត់ខ្លួនចេញពីផ្ទះកាលពីឆ្នាំ២០១០កន្លងទៅដែលកាលនោះនាងមានអាយុទើបតែ១៨ឆ្នាំប៉ុណ្ណោះ ហើយអស់​រយៈ​ពេលជាច្រើនឆ្នាំមកនេះ ក្រុមគ្រួសាររបស់នាង បានបោះបង់ការតាមរកនាងទៅហើយ។

តាមប្រភពព័ត៌មានបានឲ្យដឹងថា បន្ទាប់ពីរត់ចេញពីផ្ទះនារីខាងលើនេះ បានទៅរស់នៅជាមួយនឹងមិត្តប្រុសរបស់នាង ដែលនៅឆ្ងាយពីផ្ទះនាងផ្ទាល់ត្រឹមតែ៥០០ម៉ែត្រដោយមានក្រុមគ្រួសារខាងមិត្តប្រុសរស់នៅជាមួយផងដែរ។ តែទោះជាយ៉ាងណាក្ដី ក្រុមគ្រួសារខាងប្រុសមិនបានដឹងឮអ្វីឡើយព្រោះមិត្តប្រុសរបស់នាង បានឲ្យនាងរស់នៅក្នុងបន្ទប់ដោយចាក់សោរ មិនចេញទៅណាមកណាទេ។ហើយជារៀងរាល់ថ្ងៃ នាងតែងតែបំបាត់ភាពអផ្សុក ដោយការមើលទូរទស្សន៍តូចមួយ ដែលដាក់កាសត្រចៀក ចៀសវាងគេឯងឮសំឡេងចេញពីទូរទស្សន៍។

ទន្ទឹមនឹងនេះដែរ បងប្រុសរបស់មិត្តប្រុសនាងបាននិយាយថាមានពេលខ្លះប្អូនប្រុសរបស់ខ្លួនមានអាកប្បកិរិយាដូចមនុស្សខុសប្រក្រតីអីចឹងដែលអាចឈានដល់ប្រើហិង្សា នៅពេលមាននរណាម្នាក់ចង់ចូលទៅក្នុងបន្ទប់របស់គេម្ដងៗ។

កាលពីបីខែមុន មិត្តប្រុសរបស់នាងបានឈ្លោះប្រកែកជាមួយនឹងក្រុមគ្រួសារ ហើយក៏សម្រេចចិត្តរត់ចេញពីផ្ទះ ដែលទៅរស់នៅក្នុងភូមិផ្សេងមួយទៀតក្នុងគោលបំណងចាប់ផ្ដើមជីវិតឲ្យមានសេរីភាពឡើងវិញ។ តែយ៉ាងណាមិញ ក្រុមគ្រួសារខាងប្រុសបានរាយការណ៍ពីករណីបាត់ខ្លួន រហូតដល់ខាងប៉ូលិសតាមស៊ើបរកឃើញ និងគ្រប់យ៉ាងត្រូវបានបែកការណ៍កាលពីថ្មីៗនេះ។

ចំពោះមូលហេតុនៃការលួចលាក់មានស្នេហាជាមួយគ្នានេះខាងមន្ត្រីប៉ូលិសបានឲ្យដឹងថា ដោយសារតែពួកគេទាំងពីរមានជំនឿសាសនាខុសគ្នាតែយ៉ាងណាក៏ដោយ ក្រោយពីសាកសួរនិងដោះស្រាយរួចរាល់មក ពួកគេទាំងពីរក៏ត្រូវបានអនុញ្ញាតឲ្យរួមរស់ជាមួយគ្នាផងដែរ៕

សូមទស្សនារូបភាពខាងក្រោម៖

ប្រភព: ladbible.com