ភោជនីយដ្ឋានម៉ិកស៊ិក កុម៉្មង់អាហារភ្លាម ចាំប៉ុន្មានវិនាទីសោះ បានភ្លែតហ្មង (មានវីដេអូ)

ម៉ិកស៊ិក៖ ភ្ញៀវទាំងអស់ដែលទៅទទួលទានអាហារនៅភោជនីយដ្ឋាន Kame Garibaldi Santa Tereក្នុងទីក្រុង Guadalajara នៃប្រទេសម៉ិកស៊ិកនឹងបានឃើញអាហាររបស់ពួកគេមកដល់លើតុ ត្រឹមតែរយៈពេល១៣.៥វិនាទីប៉ុណ្ណោះបន្ទាប់ពីពួកគេបានចូលអង្គុយ។

ជាក់ស្ដែង ល្បឿនសេវាកម្មរបស់ភោជនីយដ្ឋាននេះ ថែមទាំងត្រូវបានទទួលស្គាល់ជាផ្លូវការផងដែរដែលវិលត្រឡប់ទៅវិញក្នុងខែសីហា ឆ្នាំ១៩៩៦ ខណៈវាត្រូវបានផ្តល់កំណត់ត្រាពិភពលោកហ្គីនណេសសម្រាប់សេវាកម្មលឿនបំផុតនៅលើពិភពលោក។ ទោះជាយ៉ាងណាក៏ដោយ មកទល់បច្ចុប្បន្ននេះ គេមិនទាន់ដឹងច្បាស់ថាតើភោជនីយដ្ឋាននេះនៅតែកាន់កាប់តំណែងនេះបន្ដឬអត់ទេ ដោយសារកំណត់ត្រាពិភពលោកហ្គីនណេស មិនត្រួតពិនិត្យកំណត់ត្រាទៀតឡើយ។

តួយ៉ាង​ ភោជនីយដ្ឋាននេះ បានបើកដំណើរការដំបូងតាំងពីឆ្នាំ១៩៧០ម៉្លេះ និងបានប្រកាសលើគេហទំព័ររបស់ខ្លួនថា«យើងរីករាយនឹងកិត្យានុភាពអន្តរជាតិសម្រាប់សេវាកម្មរហ័សដែលយើងផ្តល់ជូនព្រោះក្នុងរយៈពេលត្រឹមតែ ១៣.៥វិនាទី អ្នកនឹងទទួលបានអាហាររបស់អ្នក»។ ហើយចាប់តាំងពីទទួលបានកេរ្តិ៍ឈ្មោះសម្រាប់សេវាកម្មរហ័សទាន់ចិត្តភោជនីយដ្ឋានបានក្លាយជាការពេញនិយមយ៉ាងខ្លាំង និងគួរឲ្យអស់សំណើច ព្រោះមានន័យថា ភ្ញៀវនឹងត្រូវរង់ចាំជាជួរដើម្បីចូល។

ចំពោះមុខម្ហូបវិញមានតែមួយគត់នៅលើម៉ឺនុយ គឺមានឈ្មោះថា Carne en su jugo ដែលជាហេតុភោជនីយដ្ឋានអាចបម្រើអតិថិជនបានយ៉ាងឆាប់រហ័ស។ហើយនៅពេលភ្ញៀវម្នាក់ៗចូលអង្គុយភ្លាម ខាងអ្នករត់តុ នឹងដាក់អាហារប៉ុន្មានចានរួចជាស្រេចដែលសម្រាប់ទទួលទានបន្ទាប់បន្សំ មុនពេលលើកអាហារចានសំខាន់ ដោយភ្ញៀវអាចសម្លឹងកត់សម្គាល់នាទីនៃការបម្រើសេវាកម្ម។

យ៉ាងណាមិញ មានភ្ញៀវមួយចំនួនដែលធ្លាប់បានទៅសាកល្បងភោជនីយដ្ឋាននេះ បានលើកឡើងថា​ អាហារមានរសជាតិឆ្ងាញ់ តែមិនមែនគ្រប់គ្នាបានទទួលអាហារក្នុងរយៈពេល១៣.៥វិនាទីទាំងអស់ទេ ដោយរង់ចាំ១នាទី​ឬ២នាទី៕

ប្រភព: Daily Mail

សូមទស្សនារូបភាពខាងក្រោម៖