<p>ចំពោះ​គ្នា​យើង​មួយ​ចំនួន ពេល​យប់​ដែល​ចង់​គេង​សម្រាក​ឲ្យ​បាន​ស្រួល​ខ្លួន បែរ​ក្លាយ​ជា​ពេល​ខួរក្បាល​ចាប់​ផ្ដើម​គិត​វែង​ឆ្ងាយ​ដល់​ណា​ដល់​ណី ទប់​មិន​ចង់​ជាប់។ ការ​គិត​ច្រើន​បែប​នេះ បណ្ដាល​ឲ្យ​យើង​មាន​<a target="_blank" href="https://hellokrupet.com/%e1%9e%8a%e1%9f%86%e1%9e%8e%e1%9f%81%e1%9e%80/%e1%9e%94%e1%9e%89%e1%9f%92%e1%9e%a0%e1%9e%b6%e1%9e%82%e1%9f%81%e1%9e%84%e1%9e%98%e1%9e%b7%e1%9e%93%e1%9e%9b%e1%9e%80%e1%9f%8b/">បញ្ហា​គេង​មិន​លក់</a> ឈឺ​ក្បាល និង​មាន​អារម្មណ៍​ថា ល្ហិតល្ហៃ​ក្នុង​ខ្លួន​ថែម​ទៀត។</p><h3>ហេតុ​អ្វី​បាន​យើង​គិត​ច្រើន​​នៅ​ពេល​យប់?</h3><p>ការ​គិត​ច្រើន​នៅ​ពេលយប់ ភាគ​ច្រើន​បណ្ដាល​មក​ពី​ដំណើរការ​ខួរក្បាល​រម្លឹក​ដល់​ហេតុការណ៍​ដែល​បាន​កើត​ឡើង​នៅ​ពេល​ថ្ងៃ ឬ​រម្លឹកដល់​ហេតុការណ៍​ណា​មួយ​កើត​ឡើង​ក្នុង​ជីវិត​ដែល​យើង​មិន​អាច​បំភ្លេច​បាន។ ម៉្យាង​វិញ​ទៀត នៅ​ពេល​ថ្ងៃ យើង​មមាញឹក​នឹង​ការងារ ហេតុ​នេះ​ហើយ ខួរក្បាល​មិន​សូវ​មាន​ពេល​ទំនេរ​គិត​ដល់​ហេតុការណ៍​អស់នោះ។ ការ​គេង​មិន​លក់ ដោយសារ​គិត​ច្រើន ក៏​អាច​ជា​សញ្ញា​នៃ​បញ្ហា​<a target="_blank" href="https://hellokrupet.com/%e1%9e%9f%e1%9e%bb%e1%9e%81%e1%9e%97%e1%9e%b6%e1%9e%96%e1%9e%95%e1%9f%92%e1%9e%9b%e1%9e%bc%e1%9e%9c%e1%9e%85%e1%9e%b7%e1%9e%8f%e1%9f%92%e1%9e%8f/">សុខភាព​ផ្លូវចិត្ត​</a>យើង​ដែរ​ដូច​ជា ជំងឺ<a target="_blank" href="https://hellokrupet.com/%e1%9e%9f%e1%9e%bb%e1%9e%81%e1%9e%97%e1%9e%b6%e1%9e%96%e1%9e%95%e1%9f%92%e1%9e%9b%e1%9e%bc%e1%9e%9c%e1%9e%85%e1%9e%b7%e1%9e%8f%e1%9f%92%e1%9e%8f/%e1%9e%87%e1%9f%86%e1%9e%84%e1%9e%ba%e1%9e%90%e1%9e%94%e1%9f%8b%e1%9e%94%e1%9e%b6%e1%9e%9a%e1%9e%98%e1%9f%92%e1%9e%97/"> ថប់​បារម្</a>ភ​ជា​ដើម។</p><h3>តិចនិក​សាមញ្ញ​បញ្ឈប់​ការ​គិត​ច្រើន ងាយ​គេង​ពេល​យប់</h3><h3>១. ឈប់​ប្រើ​ទូរស័ព្ទ ឬ​កុំព្យូទ័រ</h3><p>ការ​ប្រើ​ទូរស័ព្ទ ឬ​កុំព្យូទ័រ​មុន​ពេល​ចូល​គេង អាច​បង្កើន​កម្រិត​ថប់បារម្ភ និង​ស្ត្រេស ពិសេស​ពេល​ដែល​យើង​បាន​អាន មើល​រឿង ឬ​ព័ត៌មាន​រន្ធត់​ធ្វើ​ឲ្យ​យើង​បារម្ភ ខ្លាច​លើស​ដើម។ លើស​ពី​នេះ ពន្លឺ​របស់​គ្រឿង​អេឡិចត្រូនិក​ទាំងនេះ ប៉ះពាល់​ទៅ​ដល់​ផលិតកម្ម​ melatonin ​នៅ​ក្នុង​រាងកាយ បណ្ដាល​ឲ្យ​យើង​ពិបាក​គេង​លក់។</p><h3>២. បន្លប់​ខ្លួន​ឯង</h3><p>បន្ទាប់​ពី​ទុក​គ្រឿង​អេឡិចត្រូនិក​អស់​នោះ​ចោល​ហើយ យើង​អាច​ធ្វើ​សកម្មភាព​អ្វី​ផ្សេង​ទៀត ដើម្បី​បន្លប់​ខ្លួន​ឯង​ឲ្យ​ឆាប់​ងងុយ​គេង។ យើង​អាច​បែរ​ទៅ​<a target="_blank" href="https://hellokrupet.com/%e1%9e%9f%e1%9e%bb%e1%9e%81%e1%9e%97%e1%9e%b6%e1%9e%96%e1%9e%95%e1%9f%92%e1%9e%9b%e1%9e%bc%e1%9e%9c%e1%9e%85%e1%9e%b7%e1%9e%8f%e1%9f%92%e1%9e%8f/%e1%9e%9c%e1%9e%b7%e1%9e%92%e1%9e%b8%e1%9e%94%e1%9f%86%e1%9e%94%e1%9e%b6%e1%9e%8f%e1%9f%8b%e1%9e%9f%e1%9f%92%e1%9e%8f%e1%9f%92%e1%9e%9a%e1%9f%81%e1%9e%9f/99154/">អាន​សៀវភៅ​</a>ប្រលោមលោក សៀវភៅ​ត្លុក ឬ​អង្គុយ​សរសេរ​កំណត់​ពី​អ្វី​ដែល​បាន​កើត​ឡើង​ពេល​ថ្ងៃ​ក៏​បាន។ ការ​ធ្វើ​សកម្មភាព​បែប​នេះ​អាច​ជួយ​បន្លប់​ខួរក្បាល​យើង​មិន​ឲ្យ​គិត​ច្រើន ជួយ​ឲ្យ​យើង​គេង​បាន​លក់​ស្រួល។</p><h3>៣. ដុត​ប្រេង​ក្រអូប</h3><p>ការ​ដុត​ប្រេង​ក្រអូប​នៅ​ក្នុង​បន្ទប់ ជួយ​សម្រួល​អារម្មណ៍​របស់​យើង​បាន និង​បង្កើត​បរិយាកាស​ស្ងប់ស្ងាត់​ធូរ​ស្រាល ពិសេស​ប្រេង​ក្រអូប​ក្លិន​ផ្កា Lavender។ ប៉ុន្តែ ត្រូវ​ប្រយ័ត្ន​នៅ​ពេល​ប្រើ​ប្រេង​ក្រអូប ព្រោះ​វា​អាច​បង្ក​ឲ្យ​អាលែកហ្ស៊ីបាន។</p><h3>៤. ដក​ដង្ហើម​វែងៗ</h3><p>ការ​ដក​ដង្ហើម​វែងៗ ដើរ​តួ​ជា​តិចនិក​បន្លប់​អារម្មណ៍​ដ៏​មាន​ប្រសិទ្ធភាព ពិសេស​ពេល​ដក​ដង្ហើម​បណ្ដើរ រាប់​លេខ​បណ្ដើរ។ ឧ. ពេល​ចាប់​ផ្ដើម​ដក​ដង្ហើម​ចូល​រាប់​ពី​ ១-៣​ យឺតៗ រួច​ដក​ដង្ហើម​ចេញ​រាប់​ពី​ ១-៥ ​យឺត។ ព្យាយាម​ផ្ដោត​អារម្មណ៍​ទៅ​លើ ការ​ដកដង្ហើម​នោះ កុំ​ឲ្យ​បែក​អារម្មណ៍។</p><p>ក្នុងករណី​មាន​សំណួរ ឬ​មន្ទិលសង្ស័យ​ជុំវិញ​សុខភាព​អ្នក ជម្រើស​ល្អ​បំផុត សូម​ពិគ្រោះ និង​ប្រឹក្សា​យោបល់​ផ្ទាល់​ជាមួយ​ពេទ្យ​ជំនាញ។&nbsp;<a target="_blank" href="https://hellokrupet.com/healthy-living/health-tips/70337/">Hello Health Group</a>&nbsp;មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕&nbsp;</p><p><b>អត្ថបទផ្ដល់សិទ្ធិដោយ&nbsp;</b><a target="_blank" href="https://hellokrupet.com/%e1%9e%8a%e1%9f%86%e1%9e%8e%e1%9f%81%e1%9e%80/%e1%9e%8a%e1%9f%86%e1%9e%8e%e1%9f%81%e1%9e%80%e1%9e%9f%e1%9f%92%e1%9e%80%e1%9e%94%e1%9f%8b%e1%9e%9f%e1%9f%92%e1%9e%80%e1%9e%9b%e1%9f%8b/153064/">Hello Krupet</a></p>

គិតច្រើនពិបាកគេង សាកល្បងសម្រួលខួរក្បាលតាមវិធីងាយៗប៉ុន្មាននេះ!