ផ្លែទំពាំងបាយជូរ មិនត្រឹមតែរសជាតិឆ្ងាញ់ទេ ថែមទាំងផ្ដល់អត្ថប្រយោជន៍ចំពោះសុខភាព ព្រោះក្នងផ្លែទំពាំងបាយជូរសម្បូរ វីតាមីន C, A ប៉ូតាស្យូម ម៉ាញ៉េស្យូម និងប្រូតេអ៊ីនជាដើម។ ការសិក្សាបានបង្ហាញថា ញ៉ាំទឹកទំពាំងបាយជូរស្រស់ ១កែវចំណុះ ២៥០មិល្លីលីត្ររាល់ថ្ងៃ ជួយឲ្យមានសុខភាពល្អ និងអាយុវែង។
មិនថាផ្លែទំពាំងបាយជូរ ឬទឹកទំពាំងបាយជូរស្រស់នោះទេគឺសម្បូរវីតាមីន C ណាស់ដែលអាចជួយពង្រឹងដល់ប្រព័ន្ធភាពស៊ាំ ជួយប្រឆាំងនឹងអុកស៊ីតកម្មបានល្អ។ បន្ថែមពីនោះក៏ជួយដល់មុខងារ សរសៃឈាម និងខួរក្បាលផងដែរ។
ទឹកទំពាំងបាយជូរក៏អាចជួយការពារពីជំងឺទឹកនោមផ្អែមប្រភេទ២បានដែរ ព្រោះវាជួយឲ្យលំពែងឲ្យមានសុខភាពល្អ កាត់បន្ថយបញ្ហាប្រឈមភាពស៊ាំអាំងស៊ុយលីន ដែលជាមូលហេតុចំបងបង្កកើតជំងឺទឹកនោមផ្អែមប្រភេទ២បាន។
សម្រាប់អ្នកចង់សម្រកទម្ងន់ ទឹកទំពាំងបាយជូរស្រស់ក៏ជាភេសជ្ជៈអាចជួយឲ្យស្រកទម្ងន់បានដែរ ព្រោះជាតិកាបូអ៊ីដ្រាត និង ជាតិខ្លាញ់ក្នុងផ្លែឈើនេះមានម្រិតទាបមិនបង្កឲ្យអ្នកញ៉ាំឡើងគីឡូនោះទេ។ ផ្ទុយមកវិញ ការញ៉ាំទឹកទំពាំងបាយជួរអាចជួយកាត់បន្ថយការឃ្លានអាហារ និង សម្រួលដល់ចរន្ដឈាមបានល្អ។
ផ្លែទំពាំងបាយជូរមានផ្ទុកអាស៊ីត Citric ជាសារជាតិអាចប្រឆាំងទៅនឹងការកកើតក្រួសក្នុងតម្រងនោមបាន។ ពិសេសក្រួស Calcium oxalate តែម្ដង ដែលជាប្រភេទក្រួសក្នុងតម្រងនោម កកើតឡើងដោយការចងភ្ជាប់គ្នារវាង ម៉ូលេគុល oxalate និង កាល់ស្យូម ក្នុងតម្រងនោម។ លើសពីនេះ អាស៊ីត Citric ក៏មានចំណែក ជួយបង្កើនកម្រិត pH ក្នុងទឹកនោមផងដែរ។
មិនខុសនោះទេ ទឹកទំពាំងបាយជូរស្រស់ក៏ជាផ្នែកមួយជួយឲ្យប្រព័ន្ធរំលាយអាហាររឹងមាំ ប្រឆាំងនឹងបញ្ហាទល់លាមក ជួយរក្សាជាតិទឹក ងាយស្រួលដល់ការបន្ទោរបង់។ វីតាមីន C ក្នុងទឹកផ្លែទំពាំងបាយជូរ ជួយដល់មុខងារបំបែកអាហាររបស់ក្រពះ និងការស្រូបសារជាតិចិញ្ចឹមរបស់ពោះវៀនតូច។ ដូច្នេះចង់ឲ្យក្រពះ និង ពោះវៀនដំណើរការបានល្អ គួញ៉ាំទឹកទំពាំងបាយជូរស្រស់ ឲ្យបានមួយកែវ ក្នុងមួយថ្ងៃ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet