ប្រវត្តិ! នៅពីក្រោយភាពជោគជ័យរបស់ CoCa Cola តាមពិតចាប់ផ្តើមដំបូងជា «ទឹកធម្មតា» តែបន្ថែមរសជាតិបែបនេះ
ជាការពិត! គ្រាន់តែលឺពាក្យថា CoCa Cola ឬ កូកាកូឡា (ជាភាសាខ្មែរ) អ្នកអាន ឬមនុស្សជុំវិញពិភពលោកប្រាកដជាបានស្គាល់នូវភេសជ្ជៈដ៏ពេញនិយមកម្រិតពិភពលោកមួយនេះ។ កូកាកូឡា គឺជាភេសជ្ជៈ ដែលគេនិយមចូលចិត្តគ្រប់ពេលវេលា ព្រមទាំងអាចយកមកប្រើប្រាស់សម្រាប់ពិសារគ្រប់ទីកន្លែង និងគ្រប់កាលៈទេសៈនៃកម្មវិធីផងដែរ។ ជាជាក់ស្តែងក្នុងព្រះរាជាណាចក្រកម្ពុជាយើងផ្ទាល់ ភេសជ្ជៈពណ៌ខ្មៅមួយនេះត្រូវបានគេប្រើប្រាស់ស្ទើរគ្រប់កម្មវិធីបុណ្យទានផ្សេង ឬការជួបជុំគ្នាលក្ខណៈមិត្តភក្តិ ឬគ្រួសារក្តី ឬពេលធ្វើដំណើរកម្សាន្តនានា។ល។
ទឹកកូកាកូឡា ត្រូវបានបង្ហាញវត្តមានលើភពផែនដីដំបូងបំផុតនាឆ្នាំ ១៨៨៦ (គិតមកទល់បច្ចុប្បន្នមានអាយុ ១៣៤ ឆ្នាំ) ផលិតដោយលោក John S.Pemberton ដែលមានសញ្ជាតិសហរដ្ឋអាមេរិក។ ទឹកកូកាកូឡា ត្រូវបានបង្កើតឡើងដំបូងក្នុងគោលបំណងជាលក្ខណៈទឹកពីសារធម្មតា គ្រាន់បន្ថែមរសជាតិប្លែក ហើយត្រូវបានដាក់លក់ក្នុងកូនតូបលក់ភេសជ្ជៈរបស់គាត់នៅក្នុងរដ្ឋ Georgia សហរដ្ឋអាមេរិក។
ត្បិតបុរសខាងលើជាអ្នកបង្កើតទឹកប្រភេទនេះឡើងក៏ដោយក្តី ប៉ុន្តែការរីកធំធាត់ និងត្រូវបានទទួលស្គាល់ជុំវិញពិភពលោកដូចសព្វថ្ងៃ បន្ទាប់ពីត្រូវបានលក់រូបមន្ត និងសិទ្ធិគ្រប់គ្រងនេះដល់ទៅបុរសអ្នកជំនួញម្នាក់ទៀតឈ្មោះ Asa Griggs Candler ក្រោយពីមានការណែនាំពីមិត្តភក្តិម្នាក់ទៀតឈ្មោះ Frank M. Robinson (ជាបុគ្គលប្រសិទ្ធនាមពាក្យ CoCa Cola ដល់ភេសជ្ជៈនេះឡើង) ។ កិច្ចព្រមព្រៀងទិញនាឆ្នាំនោះត្រូវបានឲ្យដឹងថាមានតម្លៃត្រឹម ២ ៣០០ ដុល្លារប៉ុណ្ណោះ។
បន្ទាប់ពីទិញសិទ្ធិគ្រប់គ្រង និងរូបមន្តមកលោក Asa Griggs Candler ក៏បានចាប់ផ្តើមច្នៃប្រឌិត ដោយបានច្រកជាដបលក់តែម្តង ហើយគ្រានោះក៏មានការចាប់អារម្មណ៍កាន់តែច្រើនឡើងៗ ពីសំណាក់ភ្ញៀវក្នុងតំបន់មូលដ្ឋាន និងបន្តសាយភាយការកម្ម៉ង់ទិញពីបណ្តារដ្ឋផ្សេងៗ ទៀតផង។
មិនយូរមិនឆាប់! រហូតមកដល់ត្រឹមឆ្នាំ ១៨៩២ បុរសរូបនេះបានសម្រេចចិត្តប្រកាសបើកក្រុមហ៊ុនកូកាកូឡា (The CoCa-Cola Company) ឡើងជាផ្លូវការមកទល់បច្ចុប្បន្នភាព មានអាយុកាលសរុប ១២៨ ឆ្នាំទៅហើយ ដែលមានទីស្នាក់ការនៅទីក្រុង Atlanta រដ្ឋ រដ្ឋ Georgia សហរដ្ឋអាមេរិក។
រហូតមកដល់ឆ្នាំ ១៩១៩ ក្រុមហ៊ុនភេសជ្ជៈកូកាកូឡា បានចាប់ផ្តើមលក់សិទ្ធិចែកចាយដល់បណ្តាអ្នកទិញដទៃទៀតពាសពេញសហរដ្ឋអាមេរិក ដោយមានសរុបជាង ៥ សែនកន្លែងឯណោះ។ ក្រោយបង្កើតកេរ្តិ៍ឈ្មោះរបស់ខ្លួនក្នុងទឹកដីសហរដ្ឋអាមេរិកអស់រយៈពេលជិត ១ សត្សវត្សរិ៍ ទីបំផុតកំឡុងទស្សវត្សរិ៍ឆ្នាំ ១៩៨០ ក្រុមហ៊ុននេះចាប់ផ្តើមបើកជំហរចាប់ដៃគូពីវិនិយោគិនបរទេសណា ដែលមានចំណាប់អារម្មណ៍ ហើយក៏បានទម្លាយខ្លួនជាក្រុមហ៊ុនសម្ព័ន្ធចាប់ផ្តើមដំណើរការ នៅតាមបណ្តាប្រទេសជាច្រើនជុំវិញពិភពលោកតែម្តងដូចសព្វថ្ងៃ។
យោងតាមរបាយការណ៍ចុងក្រោយ ក្នុងឆ្នាំ២០១៩ ក្រុមហ៊ុនកូកាកូឡានៅជុំវិញពិភពលោកតែម្តង រកចំនួនទឹកប្រាក់ដែលរកបានសរុបមានរហូតដល់ទៅ ៨៦ ពាន់លានដុល្លារ និងមានបុគ្គលិកបម្រើការសរុបទូទាំងផែនដីប្រមាណ៨៦ ២០០ នាក់ ខណៈមានក្រុមហ៊ុនសម្ព័ន្ធនៅតាមបណ្តាប្រទេសដទៃក្រៅពីសហរដ្ឋអាមេរិកសរុបជាង ២០០ កន្លែង៕