<p>បបូរមាត់ ក៏​ត្រូវ​ការ​ការ​​ថែ​ទាំ​ជា​ប្រចាំ​ដូច​ទៅ​នឹង​ស្បែក​របស់​យើង​ដែរ ពីព្រោះ​​​ស្បែក​នៅ​លើ​បបូរ​មាត់​ស្ដើង​ ហើយ​ថែម​ទាំង​មិន​មាន​ក្រពេញ​ញើស​ ដែល​ធ្វើ​ឲ្យ​​ងាយ​ស្ងួត និង​របក​​ថែម​ទៀត​ផង​។ ជាក់​ស្ដែង បបូរ​មាត់​​ខ្មៅ និង​បាត់បង់​ពណ៌​ស៊ីជម្ពូ​បែប​ធម្មជាតិ​ ដោយ​សារ​មូលហេតុ​ជា​ច្រើន​ ហើយ​ពណ៌​នៃ​បបូរ​មាត់​អាច​​ប្រែប្រួល​អាស្រ័យ​លើ​ទម្លាប់​នៃ​ការ​រស់នៅ​ និង​កត្តា​វេជ្ជសាស្ត្រ​មួយ​ចំនួន​ផង​ដែរ​​។</p><h3>មូលហេតុ​ធ្វើ​ឲ្យ​បបូរ​មាត់​កាន់​តែ​ខ្មៅ​​ទៅ​ៗ​</h3><ul><li><a target="_blank" href="https://hellokrupet.com/%e1%9e%91%e1%9e%98%e1%9f%92%e1%9e%9b%e1%9e%b6%e1%9e%94%e1%9f%8b%e1%9e%9b%e1%9f%92%e1%9e%a2/%e1%9e%80%e1%9e%b6%e1%9e%9a%e1%9e%95%e1%9f%92%e1%9e%8a%e1%9e%b6%e1%9e%85%e1%9f%8b%e1%9e%94%e1%9e%b6%e1%9e%9a%e1%9e%b8/100448/">ជក់​បារី​</a></li><li>អាលែកហ្ស៊ី​​នឹង​ក្រែម​លាប​មាត់</li><li>អាលែកហ្ស៊ី​នឹង​ថ្នាំ​ដុស​ធ្មេញ​ផ្ទុក​សារធាតុ​Menthol</li><li>ក្រែម​ព្យាបាល​បបូរ​មាត់​ដែល​មាន​ក្លិន</li><li>ក្រែម​លាប​មាត់​ដែល​មាន​គុណភាព​អន់​</li><li>អាលែកហ្ស៊ី​នឹង​ថ្នាំ​​មួយ​ចំនួន​</li><li>សង្កត់​ ខាំ ឬ​លិឍ​បបូរ​មាត់។</li></ul><h2>តិចនិក​សាមញ្ញៗ​មួយ​ចំនួន​ជួយ​កាត់បន្ថយ​បបូរ​មាត់​ខ្មៅ​</h2><h3>​១. រក្សា​ជាតិ​ទឹក​ក្នុង​រាងកាយ​</h3><p>កត្តា​មួយ​ចំនួន​ដូចជា​ការ​បំពុល​បរិស្ថាន​ និង​កង្វះ​ជាតិ​ទឹក​អាច​ធ្វើ​ឲ្យ​បបូរ​មាត់​ស្ងួត ប្រេះ និង​ឡើង​ពណ៌​ខ្មៅ​។ ហេតុ​នេះ​ហើយ​ ការ​ញ៉ាំ​ទឹក​ឲ្យ​បាន​ច្រើន យ៉ាង​ហោច​ណាស់​ចំនួន​​ប្រាំបី​កែវ​ក្នុង​មួយ​ថ្ងៃ​មាន​សារសំខាន់​ណាស់​ ជា​ពិសេស​នៅ​ក្នុង​រដូវ​រងា។</p><h3>២. ឈប់​ជក់​បារី​</h3><p>ការ​ជក់​បារី​មិន​ត្រឹម​តែ​បំផ្លាញ​សុខភាព​រាងកាយ​ និង​ស្បែក​ប៉ុណ្ណោះ​ទេ ​​ថែម​ទាំង​ប៉ះពាល់​ដល់​បបូរ​មាត់​របស់​យើង​ ក៏​ដូចជា​សុខភាព​​ផ្លូវ​ដង្ហើម​​។ ដូច​នេះ បើ​យើង​គប្បី​បញ្ឈប់​ការ​ជក់បារី​ ទើប​ជា​ការ​ប្រសើរ​។</p><h3>៣. ញ៉ាំ​ផ្លែឈើ​ និង​បន្លែ​ស្រស់​ៗ​ឲ្យ​បាន​ច្រើន​</h3><p>​ទន្ទឹង​នឹង​នេះ​ដែរ ការ​<a target="_blank" href="https://hellokrupet.com/%e1%9e%9f%e1%9e%bb%e1%9e%81%e1%9e%97%e1%9e%b6%e1%9e%96%e1%9e%9f%e1%9f%92%e1%9e%94%e1%9f%82%e1%9e%80/%e1%9e%9f%e1%9f%92%e1%9e%94%e1%9f%82%e1%9e%80/162926/">ញ៉ាំ​ផ្លែឈើ​ និង​បន្លែ​ស្រស់​ៗ</a>​ដែល​មាន​ជាតិ​ទឹក​ច្រើន​ដូចជា​ឪឡឹក​ ប៉េងប៉ោះ និង​ត្រសក់​ ជាដើម អាច​ជួយ​ផ្ដល់​សំណើម​ដល់​បបូរ​មាត់​ ព្រម​ទាំង​ជួយ​ឲ្យ​ពណ៌​បបូរ​មាត់​កាន់​តែ​ប្រសើរ​ជាង​មុន​។</p><h3>៤. កាត់​បន្ថយ​​​ស្នាម​ខ្មៅ​នៃ​បបូរ​មាត់​ជាមួយ​នឹង​ត្រសក់​</h3><p>ត្រសក់​ផ្ទុក​សារធាតុ​ប្រឆាំង​នឹង​អុកស៊ីតកម្ម​ និង​សមាសធាតុ​សម្បូរ​ស៊ីលីកា ដែល​អាច​ជួយ​កាត់បន្ថយ​សារធាតុ​ពណ៌​ និង​ស្នាម​ខ្មៅ​នៃ​បបូរ​មាត់​។ ចូរ​កិន​ត្រសក់​២​ទៅ​៣​ចំណិត​ និង​យក​ល្បាយ​មក​លាប​នៅ​លើ​បបូរ​មាត់​ ដោយ​ទុក​ចោល​រយៈពេល​១៥​ទៅ​២០​នាទី​ និង​លាង​ជម្រះ​ចេញ​ជាមួយ​នឹង​ទឹក​ធម្មតា។ គ្នា​យើង​អាច​អនុវត្ត​តិចនិក​នេះ​ចំនួន​១​ទៅ​២​ដង​ក្នុង​មួយ​ថ្ងៃ​។</p><p>ក្នុងករណី​មាន​សំណួរ ឬ​មន្ទិលសង្ស័យ​ជុំវិញ​សុខភាព​អ្នក ជម្រើស​ល្អ​បំផុត សូម​ពិគ្រោះ និង​ប្រឹក្សា​យោបល់​ផ្ទាល់​ជាមួយ​ពេទ្យ​ជំនាញ។&nbsp;<a target="_blank" href="https://hellokrupet.com/healthy-living/health-tips/70337/">Hello Health Group</a>&nbsp;មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕&nbsp;</p><p><b>អត្ថបទផ្ដល់សិទ្ធិដោយ&nbsp;</b><a target="_blank" href="https://hellokrupet.com/%e1%9e%9f%e1%9e%bb%e1%9e%81%e1%9e%97%e1%9e%b6%e1%9e%96%e1%9e%9f%e1%9f%92%e1%9e%94%e1%9f%82%e1%9e%80/%e1%9e%94%e1%9e%89%e1%9f%92%e1%9e%a0%e1%9e%b6%e1%9e%9f%e1%9f%92%e1%9e%94%e1%9f%82%e1%9e%80%e1%9e%95%e1%9f%92%e1%9e%9f%e1%9f%81%e1%9e%84%e1%9e%91%e1%9f%80%e1%9e%8f/164107/">Hello Krupet</a></p>

ហេតុអ្វីបបូរ​មាត់​កាន់​តែ​ឡើងខ្មៅ​? ដោះស្រាយបែបណា?