Kim Sae Ron ធ្លាប់មានអាជីព មុនត្រូវបំផ្លាញដោយការបើកបរក្នុងស្ថានភាពស្រ.វឹ.ង
កម្សាន្ត ÷ Kim Sae Ron ត្រូវបានគេដាក់ឈ្មោះជា តារាសម្ដែងកុមារដ៏ជោគជ័យបំផុតម្នាក់ របស់កូរ៉េខាងត្បូង ដោយសារតែតួនាទីជោគជ័យរបស់នាង ទើបនាងទទួលបានកេរ្តិ៍ឈ្មោះបន្តិចម្តងៗក្នុងវិស័យសិល្បៈ។
Kim Sae Ron កើតនៅថ្ងៃទី ៣១ ខែកក្កដា ឆ្នាំ ២០០០ នៅទីក្រុងសេអ៊ូល ប្រទេសកូរ៉េខាងត្បូង នាងចាប់ផ្ដើមអាជីពសម្ដែងនៅអាយុ ៩ឆ្នាំតាមរយៈខ្សែភាពយន្តរឿង «A Brand New Life» ក្រោយជោគជ័យក្នុងភាពយន្តដំបូងរបស់របស់នាង កាន់តែល្បីដល់ទស្សនិកជន ចាប់ពីពេលនោះមកអាជីពជាតារាសម្ដែងរបស់នាងកាន់តែកាក់កបទៅ។
បន្ទាប់មកនាងបានសម្តែងក្នុងខ្សែភាពយន្ត ដែលចំណាយថវិកាខ្ពស់ដូចជា «The Man from Nowhere» «I am a dad» និង «The neighbors»ជាដើម ក្រៅពីភាពយន្តជោគជ័យរបស់នាង Kim Sae Ron ក៏បានចូលរួមសម្ដែងរឿងភាគទូរទស្សន៍ល្បីៗជាច្រើនផងដែរ រឿងភាគដែលនាងទទួលបានការចាប់អារម្មណ៍ខ្លាំងបំផុតមួយចំនួនរួមមានរឿង «Love Playlist 4» «Mirror of the Witch» «Missing You» ជាដើម។
បន្ទាប់ពីប្រឡូកក្នុងវិស័យសិល្បៈ អស់រយៈពេលជាង ១៣ ឆ្នាំមក តារាស្រីរូបនេះបានទទួលពានរង្វាន់ដ៏មានកិត្យានុភាពជាច្រើនដូចជា ពានរង្វាន់តារាស្រីថ្មីល្អបំផុតនៅ Blue Dragon Awards 2014 និង Best Female Lead Award នៅ Golden Rooster និង Hundred Flowers Film Festival លើសពីនេះ Kim Sae Ron គឺជាតារាស្រីក្មេងជាងគេក្នុងប្រវត្តិសាស្ត្រកូរ៉េ ដែលត្រូវបានតែងតាំងសម្រាប់ពានរង្វាន់តារាសម្ដែងល្អបំផុតនៅ The Baeksang Arts Awards នៅអាយុ ១៤ ឆ្នាំ។
ក្រៅពីអាជីពសម្តែងដ៏រុងរឿងរបស់នាង Kim Sae Ron ក៏បានឆក់យកបេះដូងអ្នកគាំទ្រផងដែរ ដោយសារតែសម្រស់ដ៏ស្រស់ស្អាត និងសុភាពរបស់នាង ហើយក្នុងអំឡុងពេល ១៣ឆ្នាំកន្លងទៅនេះ Kim Sae Ron មិនដែលជាប់ពាក់ព័ន្ធរឿងអាស្រូវធ្ងន់ធ្ងរ ដែលប៉ះពាល់ដល់កេរ្តិ៍ឈ្មោះរបស់នាងឡើយ។
យ៉ាងណាមិញ កាលពីថ្ងៃទី១៨ ខែឧសភា ប្រព័ន្ធផ្សព្វផ្សាយកូរ៉េ បានរាយការណ៍ថា តារាស្រីរូបនេះ ត្រូវបានប៉ូលីសស៊ើបអង្កេត ពីបទបើកបរក្នុងស្ថានភាពស្រវឹង ធ្វើឲ្យនាងបានធ្លាក់ចូលទៅកក្នុងរឿងអាស្រូវដ៏ធំ ហើយត្រូវបានចាប់ខ្លួនខណៈនាងព្យាយាមរត់គេចពីកន្លែងកើតហេតុ ភ្លាមៗបន្ទាប់ពីលទ្ធផលនៃការស៊ើបអង្កេតរបស់ភ្នាក់ងារប៉ូលីស ត្រូវបានប្រកាស តារាសម្តែង Kim Sae Ron បានសារភាពពីអាកប្បកិរិយារបស់នាងភ្លាមៗ ហើយបានសុំទោសតាមរយៈក្រុមហ៊ុនគ្រប់គ្រង Gold Medalist ហើយបន្ទាប់មកសរសេរពាក្យសុំទោសសរសេរដោយដៃ។
ថ្វីត្បិតតែតារាស្រីរូបនេះបានសារភាពថាខ្លួនពិតជាខុសចំពោះឧប្បត្តិហេតុនេះក៏ដោយ ប៉ុន្តែទស្សនិកជនជាច្រើនជឿថារឿងអាស្រូវនេះ នឹងបំផ្លាញអាជីពដ៏ត្រចះត្រចង់របស់នាងរួចទៅហើយ ពីតារាសម្ដែងល្បីប្រចាំផលិតកម្មកូរ៉េ Kim Sae Ron ប្រឈមនឹងការបាត់បង់គ្រប់យ៉ាង ព្រោះតែធ្វើខុស នេះក៏ជាមេរៀនដ៏មានតម្លៃ ក្នុងអាជីពសិល្បៈរបស់នាងផងដែរ៕
ប្រភព: Kbizoom