ឈ្មោះ Bella ដូចគ្នា តារាស្រីទាំងនេះ ស្ពាយទាំងសម្រស់និងកេរ្តិ៍ឈ្មោះល្បីល្បាញមិនចាញ់គ្នា

កម្សាន្ដ៖ បើនិយាយពីឈ្មោះ Bella តើប្រិយមិត្តនឹកឃើញដល់អ្នកណាមុនគេ ច្បាស់ណាស់ តារាស្រីដែលមានឈ្មោះនេះ ហើយមានឥទ្ធិពលជាងគេនោះគឺ មាន៣នាក់។ ជាពិសេស ពួកគេស្ថិតនៅក្នុង រង្វង់សិល្បៈ ដូចគ្នាមែន ប៉ុន្ដែពួកគេមាន សមត្ថភាពទេពកោសល្យ ខុសគ្នា និង ស្ថិតនៅកន្លែងខុសៗគ្នា។ 

នៅក្នុងនោះ Bella Hadid គឺជា តារាបង្ហាញម៉ូតលំដាប់ពិភពលោក ដែលនាងមាន រូបរាង ស្រឡូន និង សម្រស់ស្រស់ស្អាតបែបអឺរ៉ុប ហើយនាងមានសញ្ជាតិ អាមេរិក និង មានអាយុ ២៥ឆ្នាំ។ មិនតែប៉ុណ្ណោះ នាងជាតារាស្រីមួយរូបដែលមានភាពល្បីល្បាញខ្លាំងផងដែរ។

ចំណែក Bella Ranee វិញ ជាតារាសម្ដែងស្រីថៃ លំដាប់តួឯក មានសម្រស់ស្អាតបែបសុភាពនារី ហើយមានប្រជាប្រិយភាពខ្លាំងនៅអាស៊ី។ មិនតែប៉ុណ្ណោះ នាងមានសម្រស់ក្មេងជាងវ័យ ដែលឆ្នាំនេះ មានអាយុ ៣១ឆ្នាំទៅហើយ ប៉ុន្ដែនៅតែមានមន្ដស្នេហ៍ទាក់ទាញ។

ចុងក្រោយ Bella Poarch ជាតារាចម្រៀងកូនកាត់​ ហ្វីលីពីន និង អាមេរិក មានអាយុ ២៤ឆ្នាំ ដែលនាងត្រូវបានគេស្គាល់តាមរយៈបណ្ដាញសង្គម ​TikTok។ ក្រោយមកនាងបានចេញ ចម្រៀងបទ Build a Bitch ដែលទទួលបានការគាំទ្រជាខ្លាំង៕