អ្នកសុំទានរូបសង្ហា ផ្លាស់ប្ដូរជីវិតមិនគួរឲ្យជឿ ក្រោយត្រូវបានគេប្រមាញ់រូប

ចិន៖ រឿងរ៉ាវដែលមិនគួរឲ្យជឿនេះ បានកើតឡើងកាលពី១១ឆ្នាំមុន នៅពេលដែលបុរសជា អ្នកសុំទាន ត្រូវបាន ជាងថតរូប ម្នាក់លួចថតរូបរបស់ខ្លួននៅពេលកំពុងដើរតាមផ្លូវ។ មូលហេតុដែលធ្វើឲ្យ ជាងថត ប្រមាញរូបបុរសជាអ្នកសុំទាន ក៏ព្រោះតែគេដើរធ្វើដំណើរលើដងផ្លូវយ៉ាងមានភាពជឿជាក់។ ទោះបីជា សម្លៀកបំពាក់របស់គេសំពីងសសំពោងមែន ប៉ុន្តែការដើររបស់គេប្រៀបដូចជាតារាម៉ូឌែលកំពុងបង្ហាញម៉ូតអញ្ចឹង។ 

បុរសម្នាក់នេះ មានអាជីពជា អ្នកសុំទាន ទៅតាមដងផ្លូវដើម្បីចិញ្ចឹមក្រពះ ប៉ុន្តែជីវិតរបស់គេបានផ្លាស់ប្ដូរ បន្ទាប់ពីរូបថតមួយសន្លឹក បានធ្វើឲ្យបុរសនេះល្បីល្បាញយ៉ាងខ្លាំង។ មិនត្រឹមតែប៉ុណ្ណោះ មហាជននៅចិនបានដាក់ឈ្មោះក្រៅថា "beggar marshal", "Brother Sharp" និង "អ្នកសុំទានសង្ហាជាងគេប្រចាំប្រទេសចិន"។

មុនដំបូង Brother Sharp ទាក់ទាញមនុស្សម្នារ សុំថតរូប និយាយលេងជាមួយលោក និងឲ្យលុយកាក់ចាយ ប៉ុន្តែបន្ទាប់មកមានអ្នកការសែត ទស្សនារដ្តី មកយកព័ត៌មានជាបន្តបន្ទាប់ រហូតដល់មានក្រុមហ៊ុនខាងម៉ូដសម្លៀកបំពាក់ និងអ្នកបង្ហាញម៉ូដមួយចំនួនបានទាក់ទងមក អ្នកសុំទានសង្ហា រូបនេះ។ 

ក្រោយមកខាងសមាគមន៍អនឡានក៏បានជួយឧបត្ថម្ភជាប្រាក់មួយចំនួនដល់ អ្នកសុំទានល្បីល្បាញ រូបនេះ។ លើសពីនោះ គាត់ត្រូវបានអញ្ចើញទៅដើរបង្ហាញម៉ូដជាតារាម៉ូឌែលដែលរកចំណូលបានដល់ទៅជាង ៤៦០០ ដុល្លារអាមេរិក ដែលលើសពីចំណូលអ្នកសុំទានធម្មតារាប់សិបដង។

អរគុណដល់រូបថតទាំងនោះ ដែលបានធ្វើឲ្យជីវិតរបស់គេប្រសើរជាងមុន ហើយថែមទាំងធ្វើឲ្យគ្រួសារបានជួបជុំគ្នាវិញទៀតផង។ បុរសសុំទានល្បីល្បាញ ទទួលការមើលថែយ៉ាងដិតដល់ពីសាច់ញាតិ និងទទួលការអញ្ចើញទៅចូលរួមកម្មវិធីដើរម៉ូដជាច្រើនបន្តបន្ទាប់ ថែមទាំងបានសម្ដែងក្នុងរឿង និងថតផ្សាយពាណិជ្ជកម្មបានប្រាក់កម្រៃយ៉ាងសន្ធឹកសន្ធាប់មកចិញ្ចឹមកូនៗនិងគ្រួសាររបស់ខ្លួនបានយ៉ាងស្រួល៕

ប្រភពពី៖ Kenh14.vn